Prezıdent memlekettik tsıfrlyq júıelerdiń jumysyn synǵa aldy

ASTANA. KAZINFORM — Úkimet bıýdjetten qyrýar qarajat shyǵyndamaı, tapsyrmany oryndaýdyń josparyn usynýy tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

— Sońǵy kezde memlekettik tsıfrlyq júıelerdiń jumysynan aqaý shyǵyp júr. Bul qazirgi ІT-tásilderdiń tehnologııalyq jaǵynan eskirgenin jáne basqarý sapasynyń tómendigin kórsetedi. Mundaı olqylyqtar memlekettiń bıznes ókilderimen jáne azamattarmen qarym-qatynasyna keri áserin tıgizedi. Sondaı-aq tıimdi tsıfrlyq orta qalyptastyrý jumysyn tejeıdi. Tsıfrlyq ózgeristiń bári QazTech platformasynyń negizinde jasalýy tıis, — dedi Qasym-Jomart Toqaev.

Prezıdenttiń aıtýynsha, Úkimetke biryńǵaı tsıfrlyq platformaǵa kóshýge týra keledi. Bul — mańyzdy mindet.

— Buǵan deıin vedomstvolardyń bári tsıfrlandyrýmen eshqandaı baqylaýsyz, óz betinshe aınalysyp keldi. Bul tehnıkalyq problemalardy kóbeıtip qoımaı, qazyna qarjysyn ońdy-soldy shashýǵa ákep soqty. Bas prokýratýrada ótken jıynda Úkimet músheleri shashyrańqy júıelerdiń basyn biriktirýge qansha qarjy qajet ekenin jarııa etti. Basyn ashyp aıtaıyn, mundaı aqsha jumsalýy múmkin emes. El aýzynda júrgen bir qurylysshy-sheneýnik aıtqandaı, aqshasy bolsa, ǵımaratty aqymaq ta salady, al osy mindetti qarjysyz sheshýge sheberlik qajet. Al sheberlikterińizdi kórsetińizder. Úkimet bıýdjetten qyrýar qarajat shyǵyndamaı, tapsyrmany oryndaýdyń josparyn usynýy tıis, — dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.