Prezıdent memlekettik tildi úıretýde JI áleýetin barynsha paıdalaný kerektigin aıtty
ASTANA. KAZINFORM – Memleket basshysy Halyqaralyq «Qazaq tili» qoǵamynyń tóraǵasy Raýan Kenjehanulyn qabyldady, dep habarlaıdy Aqorda.
Prezıdentke «Qazaq tili» qoǵamy qazaq tilin oqytý ádistemesin jetildirý, qazaqsha mazmundy baıytý jáne jańa tehnologııalar salasynda tildiń qoldanys aıasyn keńeıtý sekildi úsh negizgi baǵyt boıynsha jobalardy júzege asyryp jatqany jóninde baıandaldy.
Raýan Kenjehanuly OpenAI kompanııasymen birlesken joba aıasynda kólemi 14 mıllıard token bolatyn mátin korpýsy qalyptasqanyn jáne 12 myń saǵat aýdıojazba jınaqtalǵanyn aıtty.
Sońǵy úsh jylda Disney, Pixar jáne Sony stýdııalarynyń 13 tanymal fılmi qazaq tilinde dybystalyp, úlken ekranǵa shyqty.
Qazaq Tili Endowment qorynyń jumysy týraly málimet berdi.
Qazirge kezde qorǵa túsken jarna kólemi 824 mıllıon teńgege jetken.
Memleket basshysy Halyqaralyq «Qazaq tili» qoǵamynyń qyzmetine joǵary baǵa berip, aldaǵy josparlary tabysty bolýyna tilektestik bildirdi.
Prezıdent memlekettik tildi úıretý, sondaı-aq ǵylymı shyǵarmalardy aýdarý isinde jasandy ıntellektiniń áleýetin barynsha paıdalaný mańyzdy ekenin atap ótti.
Aıta keteıik, Prezıdent Azııa oıyndary jáne Azııa paraoıyndarynyń júldegerlerin marapattady.
