Prezıdent Memlekettik qyzmet isteri agenttiginiń tóraǵasy Darhan Jazyqbaıdy qabyldady
ASTANA. KAZINFORM — Prezıdent Memlekettik qyzmet isteri agenttiginiń tóraǵasyn qabyldady.
Darhan Jazyqbaı agenttiktiń byltyrǵy atqarǵan jumysynyń esebi men aldaǵy kezeńge arnalǵan josparyn tanystyrdy.
Ol mansaptyq jáne pozıtsııalyq model elementterinen turatyn memlekettik qyzmettiń gıbrıdti modelin qalyptastyrý jumystary týraly baıandady.
Sonymen qatar ashyq memlekettik apparat qurý, atap aıtqanda, jeke sektordan bilikti mamandardy tartý jáne joǵary oqý oryndaryn úzdik bitirgen túlekterdi tómengi laýazymdarǵa konkýrs ótkizbeı-aq taǵaıyndaý sharalary jóninde málimet berip, e-Qyzmet júıesi boıynsha memlekettik qyzmetke irikteıtin pılottyq jobanyń qorytyndysyn tanystyrdy.
Sonyń nátıjesinde bos laýazymǵa ornalasý úshin konkýrsqa qatysýshylar sany 2,7 ese artqan.
Bıyl e-Qyzmet irikteý júıesin barlyq memlekettik organǵa kezeń-kezeńimen engizý jumystary bastalǵan.
Agenttiktiń memlekettik qyzmet kórsetý sapasyn baqylaý jáne basqarý júıesin bıýrokratııadan aryltý salalaryna qatysty jumystary týraly aqparat berdi.
Prezıdent servıstik jáne adamdarǵa beıimdelgen memlekettik apparatty qalyptastyrý, memlekettik qyzmetshilerdiń kásibı biliktiligin arttyrý jáne memlekettik qyzmet júıesine zamanaýı tehnologııalardy engizý isin jalǵastyrýdy tapsyrdy.
