Prezıdent memlekettik áleýmettik tapsyrys týraly jańa zań ázirleýdi tapsyrdy

BÝRABAI. KAZINFORM – Memlekettik áleýmettik tapsyrystyń tıimdiligin arttyrý úshin jeke zań kerek. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

Quryltaı músheleri Zúlfııa Baısaqova men Baný Nurǵazıeva memlekettik áleýmettik tapsyrystyń krıterıılerin qaıta qaraý jáne úkimettik emes uıymdar týraly zańnamany jetildirý qajettigin aıtqan.

− Azamattyq sektor reformalardy júrgizý jáne qoǵamdy damytý isinde mańyzdy ról atqarady. Memleket pen ÚEU seriktestigi ózekti máselelerdi sheshýge, jasampaz qundylyqtardy dáripteýge jáne ulttyń jańa sapasyn qalyptastyrýǵa yqpal etedi. Sondyqtan memlekettik áleýmettik tapsyrystyń tıimdiligin arttyrý úshin qazirgi zamannyń talaptaryna saı keletin jeke zań kerek, − dedi Qasym-Jomart Toqaev.

Memleket basshysy zań jobasyn ázirleýde qujatqa tereń jáne jan-jaqty saraptama jasalýy qajettigin basa aıtty.

− Quzyrly organdar sarapshylar men qoǵamdyq uıymdardy tarta otyryp, bul máselemen aınalysýy kerek, − dedi Prezıdent.

Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi.

Ulttyq quryltaı jandanǵaly eldegi áleýmettik-ekonomıkalyq máseleler sheshim taýyp keledi.

Jyl ótken saıyn taqyryp aıasy keńidi, aıtylatyn salmaqty oı ulǵaıdy. Alqaly jıynda nazarda bolǵan kemshilikti túzetý zań sheńberinde bekip, qoǵamnyń oń baǵytqa bet alǵanyn baıqaımyz. Osy oraıda Kazinform tilshisi ótken quryltaılardyń nátıjesine kóz júgirtti.