Prezıdent Memlekettik kúzet qyzmetine jańa mindetter júktedi

ASTANA. QazAqparat – Prezıdent Qasym-Jomart Toqaev Memlekettik kúzet qyzmetine birqatar qosymsha quzyret beretin Jarlyqqa qol qoıdy, dep habarlaıdy QazAqparat tilshisi.

«Qazaqstan Respýblıkasy Prezıdentiniń jáne basqa da kúzetiletin adamdardyń qaýipsizdigin qamtamasyz etý jáne olardyń ómirine, densaýlyǵyna, quqyǵyna, bostandyǵyna, jeke basynyń qadir-qasıetine jáne menshigine qarsy baǵyttalǵan quqyq buzýshylyqty anyqtaý, aldyn alý jáne jolyn kesý», - delingen Memleket basshysy qol qoıǵan Jarlyqta.

Ózgeriske saı, budan bylaı Memlekettik kúzet qyzmeti myna fýnktsııalardy atqarady:

- Memlekettik kúzet qyzmetiniń bastyǵy belgilegen tártipte kúzetiletin obektilerdiń kúzeti men qorǵanysyn júzege asyrady, jaýyngerlik kezekshilikti atqarýdy uıymdastyrady;

- kúzet is-sharalaryn ótkizý oryndarynda kúzetiletin adamdar men obektilerdiń bıologııalyq qaýipsizdigin qamtamasyz etý jónindegi jumysty vedomstvoaralyq úılestirýdi jáne uıymdastyrýdy júzege asyrady;

- qorǵanys ónerkásibi jáne memlekettik qorǵanystyq tapsyrys salasyndaǵy memlekettik saıasatty qurastyrýǵa jáne iske asyrýǵa qatysady;

- áskerı-tehnıkalyq yntymaqtastyqty júzege asyrýǵa qatysady;

- jedel basqarýynda turǵan qarý-jaraq pen áskerı tehnıkanyń aınalymyna baqylaýdy júzege asyrady;

- QR jergilikti atqarýshy organdarymen ózara árekettese otyryp jumyldyrý josparlaryn oryndaýǵa daıyndyq jónindegi is-sharalardy ótkizedi;

- áskerı-ekonomıkalyq jáne komandalyq-shtabtyq oqý-jattyǵýlaryn ótkizýge qatysady;

- kúzetiletin obektilerdiń terrorızmge qarsy qorǵalǵandyǵy pasportyn kelisedi, esebin júrgizedi, saqtaıdy nemese joıady;

- aıryqsha maqsattaǵy avtomobılderdiń júrý qaýipsizdigin qamtamasyz etý maqsatynda Astana jáne Almaty qalalarynda avtomobıl joldary nemese avtomobıl joldarynyń jekelegen ýchaskeleri boıynsha olardyń júrý jyldamdyǵy men marshrýttaryn aıqyndaýǵa jáne osy joldarda kólik quraldarynyń júrýine, aıaldaýyna jáne toqtap turýyna shekteý engizý, jol júrisiniń baǵytyn ýaqytsha ózgertýge quqyly;

- QR Memlekettik kúzet qyzmetiniń, Qarýly Kúshteriniń, basqa da áskerleri men áskerı quralymdarynyń, quqyq qorǵaý jáne arnaýly memlekettik organdarynyń, sondaı-aq halyqaralyq sharttarǵa sáıkes, shet elderdiń arnaýly qyzmetteriniń qyzmetkerleri men áskerı qyzmetshilerin qaýipsizdikti qamtamasyz etý salasynda oqytýdy, daıarlaýdy jáne qaıta daıarlaýdy júzege asyrý.

Jarlyq alǵash resmı jarııalanǵannan 10 kún ótip baryp, 3 tamyzda kúshine enedi.

Buǵan deıin habarlaǵanymyzdaı, Memlekettik kúzet qyzmeti endi Nazarbaevtyń qaýipsizdigine jaýap bermeıdi.