Prezıdent: Memlekettik apparat bıznes pen azamattardyń suranysyna 3 kúnniń ishinde áreket etý qajet

NUR-SULTAN. QazAqparat – Prezıdent Qasym-Jomart Toqaev memlekettik apparatty sheshim qabyldaýdyń baıaý stıli men sheneýnik formalızminen arylýǵa shaqyrdy, dep habarlaıdy QazAqparat tilshisi.

«Qubylmaly jaǵdaıda memlekettik apparat ahýalǵa qaraı jedel ári úılesimdi áreket etý kerek. Sheshim qabyldaýdyń baıaý stıli men sheneýnik formalızmine bul jerde jol berýge bolmaıdy. Qazir tolyǵymen jumylý kerek. Sheshimder bıznes pe azamattardyń shynaıy suranystary negizinde jyldam qabyldanýy qajet. Ary ketse, qaıtalap aıtamyn, ary ketse 3 kún ishinde, áıtpese, táýlik ishinde qabyldanýy kerek», - degen Prezıdent Úkimet janynan qurylǵan jedel shtabtyń mindetine de toqtaldy.

«Prezıdent Úkimet janynan qurylǵan jedel shtab naqty ýaqyt rejıminde aqparatqa taldaý júrgizetin, sondaı-aq, naqty shuǵyl sharalar ázirleıtin ahýaldyq ortalyq retinde bir mezgilde jumys isteýi tıis. Júıeli deńgeıde eldiń damýyn tejeıtin shekten tys bıýrokratııany joıý qajet», - dedi Memleket basshysy.