Prezıdent memleketti basqarýdaǵy kemshilikterdi kórsetti – Azat Perýashev

NUR-SULTAN. QazAqparat – «Aq jol» partııasynyń tóraǵasy, parlamenttik fraktsııa jetekshisi Azat Perýashev Prezıdenttiń qyrkúıektiń basyndaǵy halyqqa Joldaýyna qatysty pikir bildirdi, dep habarlaıdy QazAqparat tilshisi.

«Memleket basshysynyń Joldaýy eldiń qazirgi jaǵdaıyna sáıkes jáne pandemııa kezinde memleketti basqarýdaǵy kemshilikterdi kórsetip bergen, qoǵamnyń ózgeristerge úmitti ekenin eskerip jasalǵan qujat boldy. Kóp jaǵdaıda Prezıdent máselelerdi ashyq kóterip, olardyń sheshimderin izdestirýdi usyndy. Sonymen qatar, keıbir problemaǵa Prezıdent jaýapkershilikti ózine alyp, naqty tapsyrma bergen. Ásirese Prezıdenttiń áleýmettik saladaǵy sheshimderi erekshe orynda tur. Máselen kelesi jyly zeınetaqy qoryndaǵy qarajatty halyqtyń turǵyn úı men emdelý úshin paıdalana alýy, turǵyn úı baǵdarlamalaryn jaqsarta alýy, muǵalimder men dárigerlerdiń jaǵdaılardyń kóterilýi, ınfektsııalyq aýrýlardy salý týraly tapsyrma bergenin bilesizder», - dedi Azat Perýashev OKQ-da ótken baspasóz máslıhatynda.

Onyń aıtýynsha kásipkerler Memleket basshysynyń ekonomıkalyq bastamalarynan úlken úmit kútip otyr.

«Mysaly básekelestikti damytý jáne qorǵaý jónindegi agenttikti qurý týraly sheshimi týraly aıtyldy. «Aq jol» depýtattary 2019 jyly Úkimetke saýal joldap, memlekettik monopolııa máselesin kóterip, báselestikti qorǵaýdy suraǵan edi. Úkimet ol kezde bári jaqsy degen syńaıda jaýap bergen bolatyn. Biraq Prezıdent atqarýshy bılikten góri depýtattardyń pikirine jaqyn ekenin kórsetti», - dedi ol.