Prezıdent memleket jáne qoǵam qaıratkeri Ómirbek Baıgeldiniń otbasy men týystaryna kóńil aıtty

ASTANA. KAZINFORM – Qasym-Jomart Toqaev memleket jáne qoǵam qaıratkeri Ómirbek Baıgeldiniń otbasy men jaqyn týystaryna kóńil aıtý jedelhatyn joldady, - dep habarlady Aqordanyń baspasóz qyzmeti.  

Prezıdent asa kórnekti memleket jáne qoǵam qaıratkeri, Parlament Senatynyń tuńǵysh tóraǵasy, «Otan» ordeniniń ıegeri, akademık Ómirbek Baıgeldiulynyń dúnıeden ótýine baılanysty onyń otbasy men jaqyn týystaryna kóńil aıtty.

– Ómirbek Baıgeldiuly egemendiktiń berik irgetasyn qalasqan tuǵyrly tulǵa, Otanymyzdyń damýyna qajyrly eńbek sińirgen ultjandy azamat boldy. Qazaqstan Respýblıkasy Parlamentiniń qalyptasýyna zor úles qosty. Ǵıbratty ǵumyr ıesi óziniń naǵyz parasatty tulǵaǵa tán qadir-qasıetimen barsha jurttyń syı-qurmetine bólendi. Sońyna jarqyn iz qaldyrǵan Ómirbek Baıgeldiulynyń esimi men beınesi halqymyzdyń jadynda máńgi saqtalady. Marqumnyń ımany salamat, jany jánnatta bolsyn, – dep jazylǵan jedelhatta.

Búgin Astana qalasynda kórnekti memleket jáne qoǵam qaıratkeri Ómirbek Baıgeldi ómirden ótti.