Prezıdent mektepterge engiziletin «Adal azamat» baǵdarlamasyn qoldady

BÝRABAI. KAZINFORM – Byltyr qolǵa alynǵan «Birtutas tárbıe» baǵdarlamasy jekemenshik mektepterdi de qamtýy kerek. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

− Byltyr mektepterde «Birtutas tárbıe» baǵdarlamasy qolǵa alyndy. Baǵdarlamany qabyldaý – istiń basy ǵana. Endi jańarǵan qujatty elimizdegi barlyq memlekettik bilim oshaǵyna engizý kerek. Bul qujatty aldaǵy ýaqytta jekemenshik mektepter de basshylyqqa alýǵa tıis. Sebebi tárbıe jumysy balalardy túgel qamtýy qajet, − dedi Qasym-Jomart Toqaev. 

Prezıdenttiń aıtýynsha, sonda ǵana bul bastama jalpyulttyq aýqymǵa ıe bolady. 

− Jobanyń túpki maqsaty – otanshyl, bilimdi, jasampaz urpaq tárbıeleý. Munyń bári – adal azamatqa tán qasıetter. Quryltaı músheleri aldaǵy ýaqytta osy baǵdarlamany «Adal azamat» dep ataýdy usynyp otyr. Men bul usynyspen tolyq kelisemin, − dedi Memleket basshysy. 

Eske salsaq, budan buryn Qasym-Jomart Toqaev Býrabaıda ótetin Ulttyq quryltaıdyń IV otyrysyna qatysatyny habarlanǵan edi. 

Ulttyq quryltaı jandanǵaly eldegi áleýmettik-ekonomıkalyq máseleler sheshim taýyp keledi.

Jyl ótken saıyn taqyryp aıasy keńidi, aıtylatyn salmaqty oı ulǵaıdy. Alqaly jıynda nazarda bolǵan kemshilikti túzetý zań sheńberinde bekip, qoǵamnyń oń baǵytqa bet alǵanyn baıqaımyz. Osy oraıda Kazinform tilshisi ótken quryltaılardyń nátıjesine kóz júgirtti.