Prezıdent mektep qurylysy boıynsha memleket-jeke menshik seriktestigin jetildirýdi tapsyrdy

Prezıdent óz sózinde áleýmettik nysandar halyqqa qoljetimdi bolýy tıis ekenin aıtty.

— Sóz basynda aıtyp óttim, qala halqynyń sany óte jyldam ósip jatyr. Áleýmettik ınfraqurylymǵa, ásirese, densaýlyq saqtaý jáne bilim berý júıesine zor aýyrtpalyq túsedi. Másele tym kúrdelenbeı turǵanda, júıeli jumys isteý kerek. Astana ákimi birqatar medıtsına nysanynyń jumysymen tanystyrdy. Eki emhana jáne balalarǵa arnalǵan travmatologııa ortalyǵy salynatynyn aıtty. Qalanyń medıtsına ınfraqurylymyn damytý — óte mańyzdy mindet. Osyǵan oraı, ákimdikke Densaýlyq saqtaý mınıstrligimen birlesip, tıisti sharalar qabyldaýdy tapsyramyn. Alǵashqy medıtsınalyq-sanıtarlyq kómek kórsetetin ortalyqtar adam tyǵyz qonystanǵan aýdandarda kóbirek ashylýy tıis. Bul talap bilim berý nysandaryn salǵan kezde de qatań saqtalýy kerek, — dedi Prezıdent.

Sonymen qatar, Qasym-Jomart Toqaev Astanada úsh aýysymmen oqytatyn mektep qalmaǵanyn aıtty.

— Mektep tapshylyǵy — elimizdegi asa ózekti máseleniń biri. Mektep salý qarqyny bala sanynyń ósý qarqynyna ilese almaı keledi. Aldaǵy úsh jylda mekteptegi oryn tapshylyǵy 400 myńǵa deıin jetýi múmkin. Sonyń ishinde elordada 28 myń oqýshyǵa oryn jetispeıdi degen boljam bar. Almaty, Shymkent qalalary jáne Almaty, Túrkistan, Mańǵystaý oblystarynda osyndaı jaǵdaı qalyptasýy múmkin. Árıne, bul baǵytta biraz sharýa atqaryldy. Sońǵy 5 jylda bir mıllıonnan astam oqýshyǵa arnalǵan myńǵa jýyq mektep paıdalanýǵa berildi. Astanada 75 mektep salyndy. Qazir qalada úsh aýysymmen oqytatyn mektep qalǵan joq. Bul rette «Keleshek mektepterin» erekshe atap ótken jón. Arhıtektýralyq jáne tehnıkalyq turǵydan qaraǵanda, bul — zamanaýı ári joǵary deńgeıde jabdyqtalǵan mektepter. Atalǵan baǵytta ájeptáýir tájirıbe jınadyq. Sondyqtan aýqymdy jobadan góri qaýipsiz, sapaly qurylys jumystaryna kirisýimiz kerek. Degenmen onyń baǵasy qymbat bolmaýy tıis. Bul elimizdegi bilim berý ınfraqurylymyn jańǵyrtýda qalypty jumysqa aınalýy kerek, — dedi ol.

Prezıdent mektep qurylysy boıynsha memleket-jeke menshik seriktestigin jetildirýdi tapsyrdy.

— Ásirese, jeke mektepterdi damytýǵa aıryqsha nazar aýdarǵan jón. Bul salaǵa ınvestıtsııa tartý isinde júıeli sharalar qabyldaǵan durys. Atap aıtqanda, memleket-jeke menshik seriktestik quralyn jetildirý mańyzdy. Dál qazir jeke mektepterdiń órisin keńeıtý mindeti tur. Óıtkeni tekseris barysynda qyzmetin teris maqsatta paıdalaný, tipti, alaıaqtyq jaǵdaılary anyqtalyp jatyr. Mundaı faktiler lıtsenzııa berý, qarjylandyrý, baqylaý jumystarynyń álsizdigin kórsetedi. Sonymen qatar keıbir ákimdik josparlaý kezinde úlken qatelikter jibergen. Atap aıtqanda, demografııalyq ósim men aýmaqtyq damý máseleleri eskerilmeı, jeke mektepterdi ashýǵa betaldy ruqsat berilgen. Sonyń saldarynan bir jerde memlekettik jáne jeke mektep qatar salynǵan. Al shyn muqtaj aýdandarda bilim berý ınfraqurylymy sol kúıi damymaı qalǵan. Bul vedomstvoaralyq baılanystyń álsizdigin kórsetedi, jumysqa júrdim-bardym qaraýdyń dáleli. Orta bilim berý júıesin demografııalyq esepke jáne naqty nátıjelerge negizdeı otyryp keshendi túrde damytý qajet. Qoldanystaǵy modeldi túbegeıli ózgertý kerek, — dedi Toqaev.

Budan buryn Memleket basshysy astanada aýyzsý máselesi qalaı sheshilip jatqanyn aıtty.

Sondaı-aq, Toqaev sapasyz materıaldardy paıdalaný, qurylysqa qatysty erejelerdi jáne qaýipsizdik talaptaryn saqtamaý — naǵyz qylmys ekenin atap ótti.