Prezıdent medıtsınalyq saqtandyrý júıesin synǵa aldy
ASTANA. KAZINFORM – Úkimet medıtsınalyq saqtandyrý júıesiniń qyzmetin qatań baqylaýǵa alýy kerek. Bul týraly Prezıdent Úkimettiń keńeıtilgen otyrysynda aıtty.
«Qazir memleket bıýdjetiniń jartysynan kóbi áleýmettik salaǵa bólinip jatyr. Sońǵy jyldary áleýmettik saladaǵy ınfraqurylymdy damytý úshin biraz jumys atqaryldy. Áleýmettik sala mamandarynyń, ásirese pedagogter men medıtsına qyzmetkerleriniń bedelin arttyrýǵa basa mán berildi. Endi azamattarǵa kórsetiletin qyzmettiń sapasyn jaqsartý qajet. Bul – eń aldymen, densaýlyq saqtaý salasyna qatysty másele», - dedi Prezıdent.
Mindetti áleýmettik medıtsınalyq saqtandyrý júıesiniń iske qosylǵanyna 5 jyl boldy. Sodan beri bul salanyń bıýdjeti eki ese artty. Bıyl 2,6 trıllıon teńge bólinedi.
«Alaıda, medıtsınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes. Budan bólek, kóp jaǵdaıda resýrstar tıimsiz jumsalady. Sonyń saldarynan bul salaǵa qosymsha qarjy bólip, bıýdjetke salmaq salýǵa týra keledi. Úkimet medıtsınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis», - dedi Qasym-Jomart Toqaev.
Sonymen birge Prezıdent medıtsınalyq kómektiń biryńǵaı toptamasyn qalyptastyrý qajettigin aıtty.
«Memleket kepildik beretin medıtsınalyq qyzmet onyń bazalyq bóligi bolýǵa tıis. Kelesi bóligi jumys berýshiler men azamattardyń jarnalarynan quralatyn saqtandyrý qarajaty esebinen jasaqtalýy kerek. Jergilikti atqarýshy organdardyń jaýapkershiligin arttyrǵan jón. Áleýmettik jaǵynan osal toptaǵy keıbir azamattar úshin medıtsınalyq saqtandyrý júıesine aýdarylatyn tólemder jergilikti bıýdjetten bólinýge tıis», - dedi Memleket basshysy.
