Prezıdent Medıtsınalyq saqtandyrý qorynyń óńirlik fılıaldary qyzmetine tekserý júrgizýdi tapsyrdy

ASTANA. QazAqparat – Medıtsınalyq saqtandyrý qorynyń óńirlik fılıaldary qyzmetine tekserý júrgizý qajet. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Ótken jyldyń sońynda el statsıonarlary qarajattyń qatty tapshylyǵyn bastan keshirdi. Bul qarajattyń shynymen de mańyzdy baǵyttarǵa baǵyttalmaǵanyn bildiredi. Úkimetke óńir ákimderimen birge Medıtsınalyq saqtandyrý qorynyń óńirlik fılıaldarynyń qyzmetine tekserý júrgizýi qajet», - dedi Qasym-Jomart Toqaev.

Memleket basshysy dári-dármekpen qamtamasyz etý máselesinde de jemqorlyq táýekelderi saqtalyp otyrǵanyn basa aıtty.

«Buǵan josparlaýdyń tıimsiz júıesi sep bolyp otyr. Medıtsına uıymdary áli kúnge deıin qajetti dárilik zattarda «qolmen» qalyptastyrady. Medıtsınalyq tehnıka baǵasyn aıtarlyqtaı kótermeleý de jıi kezdesetin jaıt. Densaýlyq saqtaýdyń ıntegratsııalanǵan platformasyn iske qosý máselesi áli sheshilmegen. Jumys júrgzilip jatyr, Úkimettiń de jospary úlken. Biraq, tıimdi ári jedel júzege asyrý mańyzdy», - dedi Prezıdent.