Prezıdent medıtsına qyzmetkerlerin yntalandyrýdyń jańa júıesin daıyndaýdy tapsyrdy
NUR-SULTAN. QazAqparat – Eki aıdyń ishinde Úkimet medıtsına qyzmetkerlerine ústemeaqy tóleýdiń jańa júıesin usynýy kerek. Úkimettiń keńeıtilgen otyrysynda Prezıdent Qasym-Jomart Toqaev osyndaı mindet qoıdy, dep habarlaıdy QazAqparat tilshisi.
«Koronavırýstyń taralýy jaǵdaıynda ómirge beıimdelý kerek. Pandemııa bastalǵannan beri biz vırýsqa qarsy kúreske qatysqan medıtsına qyzmetkerlerine aıtarlyqtaı járdemaqy tóleımiz. Bul ýaqytsha norma, qaıtalaımyn, ýaqytsha norma. Osy maqsattarǵa biz 200 mlrd teńgeden astam qarajat baǵyttadyq. Memlekettik bıýdjet qarajaty basqa basymdyqtarǵa – járdemaqylarǵa, zeınetaqylarǵa, memlekettik qyzmetterge jáne t.b. jumsalýy tıis ekenin túsiný kerek» - degen Memleket basshysy dárigerlerdiń jumysy árdaıym belgili bir kásibı qaýip-qatermen baılanysty ekenin eske saldy.
Sondaı-aq, Prezıdent vaktsınalaý deńgeıiniń ósýine baılanysty ústemeaqylar epıdemıologııalyq jaǵdaıǵa qaramastan, qoldanystaǵy júıeli qoldaý jáne yntalandyrý sharalarymen birtindep aýystyrylýy kerektigin aıtty.
«Densaýlyq saqtaý mınıstrligi erekshe jáne zııandy eńbek jaǵdaılarynda jumys isteıtin dárigerlerdi qoldaýdyń nusqalaryn usyndy. Atap aıtqanda, psıhıkalyq-emotsıonaldy jáne fızıkalyq belsendilik úshin jumysshylardyń jekelegen sanattaryna qosymsha tólemder men ústemeaqylar qarastyrylyp otyr. Jalaqyny birtindep arttyrýmen birge bul is-sharalar medıtsına qyzmetkerlerine eńbekaqy tóleýdiń jańa júıesine negiz bolatyn edi. Úkimetke eki aı merzimde biryńǵaı sheshim ázirleý tapsyrylady. Ázirge, meniń bilýimshe, biryńǵaı ustanym joq», - dedi Qasym-Jomart Toqaev.
