Prezıdent Májilistiń jalpy otyrysyna qatysýda
«Búgingi bizdiń jalpy otyrysymyzǵa Qazaqstan Respýblıkasynyń Prezıdenti Qasym-Jomart Toqaev qatysyp otyr. Konstıtýtsııanyń 44-baby 3-tarmaqshasyna sáıkes, Memleket basshysy Májilistegi saıası partııalarmen konsýltatsııa ótkizip, palatanyń kelisimin alý úshin Premer-Mınıstrdiń kandıdatýrasyn engizedi. Sondyqtan búgingi kúntártibinde qaralatyn bir ǵan másele ol - Qazaqstan Respýblıkasynyń Prezıdentine Qazaqstan Respýblıkasy Premer-Mınıstrin taǵaıyndaý týraly», - dedi jalpy otyrysty ashqan palata tóraǵasy Erlan Qoshanov.
Qazirgi ýaqytta Prezıdent sóz sóılep jatyr.
«Konstıtýtsııanyń 70 babyna sáıkes Májilistiń jańadan saılanýyna baılanysty Úkimet óz ókilettigin toqtatty. Osy rette Úkimettiń atqarǵan jumysyna qysqasha toqtalǵym keledi.
Biz sońǵy jyldary jahandyq jáne jalpyulttyq aýqymdaǵy kóptegen qıyndyqty bastan ótkerdik. Úkimet kúrdeli kezeńdegi jańa talapqa tez beıimdeldi. Sol arqyly ekonomıkanyń toqyraýyna jol bergen joq. Jumys oryndaryn qysqartpaı, saqtap qaldy. Shuǵyl sharalardyń nátıjesinde el ekonomıkasy 3,2 paıyzǵa ósti.
Halyqtyń aldyndaǵy áleýmettik mindettemeler ýaqtyly jáne tolyǵymen oryndaldy. Munyń bárine bılik tarmaqtarynyń birlesip jumys isteýiniń arqasynda qol jetkizdik. Osy yntymaqtastyqty nyǵaıta berý kerek»,-dedi Prezıdent.
Sondaı-aq Memleket basshysy Úkimet pen Parlament ekonomıkany damytyp, halyqtyń ál-aýqatyn arttyrý úshin barlyq kúsh-jigerin jumyldyrýǵa tıis ekenin jetkizdi.
«Biz az ýaqyttyń ishinde aýqymdy saıası reforma júrgizdik. Túbegeıli ózgerister elimizdiń jańa dáýirge qadam basýyna jol ashty. Bul jumys jalǵasa beredi.
Biraq ekonomıkalyq ózgerister saıası jańǵyrý úderisinen kenje qalmaýy kerek. Sondyqtan Úkimet áleýmettik-ekonomıkalyq reformalardy batyl júzege asyrýǵa tıis. Bul – óte jaýapty jumys.
Azamattarymyz Úkimetke zor úmit artady, joǵary talap qoıady. El senimin aqtaý – bárimizge syn.
Men keshe Parlament sessııasynyń ashylýynda naqty mindetterge toqtaldym. Úkimet strategııalyq baǵdarymyzdy júzege asyra otyryp, mynadaı máselelerge basa mán berýge tıis»,-dedi Qasym-Jomart Toqaev.