Prezıdent Majarstan Memlekettik jınalysynyń Tóraǵasyn Qazaqstanǵa shaqyrdy
BÝDAPEShT. KAZINFORM - Memleket basshysy Qasym-Jomart Toqaev Laslo Kevermen áńgimelesý barysynda óziniń Majarstanǵa sapary eki eldiń san qyrly yntymaqtastyǵyn jańa beleske kóteretinin aıtty, dep habarlaıdy Aqordanyń baspasóz qyzmeti.
Bul oraıda Prezıdent eki eldiń parlamentaralyq yqpaldastyǵy mańyzdy ról atqaratynyn erekshe atap ótti.
– Qazaqstan men Majarstannyń zań shyǵarýshy organdary arasyndaǵy qarym-qatynasty jandandyrýdy quptaımyn. Bul qos halyqtyń ózara túsinistigin nyǵaıtýǵa yqpal etedi dep sanaımyn. Oraıly sátti paıdalana otyryp, Sizdi Qazaqstanǵa saparmen kelýge shaqyramyn, – dedi Prezıdent.
Qasym-Jomart Toqaev bul baǵyttaǵy birlesken is-qımyl saýda-ekonomıkalyq áriptestikti keńeıtip, mádenı-gýmanıtarlyq baılanysty tereńdetýge tyń serpin beretinine senim bildirdi.
Memleket basshysy joǵary bilim salasyndaǵy qatynastardy arttyrýǵa basa mán berdi.
– Jańa ǵana Majarstannyń jetekshi joǵary oqý oryndarynda bilim alyp jatqan qazaqstandyq stýdenttermen kezdestim. Sizdiń elińizde oqıtyn jáne bilim alýǵa nıetti jastardy árdaıym qoldaımyz. Bul baılanystar elderimiz arasyndaǵy «altyn kópirge» aınalady, – dedi Qasym-Jomart Toqaev.
Budan keıin Qasym-Jomart Toqaev pen Laslo Kever Majarstan Parlamentiniń ǵımaratyn aralap kórdi.
Osyǵan deıin Prezıdent Majarstanda bilim alyp jatqan qazaqstandyq stýdenttermen júzdesti.
