Prezıdent Mastercard kompanııasynyń atqarýshy vıtse-prezıdentin qabyldady
Memleket basshysy Mastercard kompanııasynyń atqarýshy vıtse-prezıdenti Nıkola Vıllany qabyldady, dep habarlaıdy QazAqparat Aqordanyń baspasóz qyzmetine silteme jasap.
Kezdesý barysynda qarjy sektoryn, IT salasyn damytý, sondaı-aq shaǵyn jáne orta bıznestiń tsıfrlyq quzyretin arttyrý baǵyttaryndaǵy yntymaqtastyq perspektıvalary talqylandy.
Prezıdent Mastercard kompanııasynyń TMD-daǵy, Ortalyq jáne Shyǵys Eýropadaǵy konsaltıngtik baǵytty damytý úshin Almaty qalasyn óńirlik hab retinde tańdaý sheshimin qoldady. Innovatsııalyq tólem tehnologııasy salasyndaǵy jahandyq kóshbasshylardyń biri sanalatyn kompanııa búkil Ortalyq Azııa aımaǵy úshin bank sektoryndaǵy bıznes pen adamı kapıtaldy damytýdy josparlap otyr.
Nıkola Vılla Qazaqstannyń GovTech-sheshimderin shetelde, ásirese damýshy jáne qalyptasýshy naryqtarda ilgeriletý jospary týraly baıandady. Onyń aıtýynsha, Qazaqstannyń tsıfrlandyrý, elektrondy úkimetti jáne qolma-qol tólemsiz ekonomıkany damytý tájirıbesine Mastercard fılıaldary jumys isteıtin basqa elder erekshe qyzyǵýshylyq tanytyp jatyr.
Budan bólek, Prezıdentke Mastercard kompanııasynyń Inklıýzıvti ósim qory Qazaqstanda Strive baǵdarlamasyn iske qosatyny jóninde málimet berildi. Atalǵan baǵdarlama elimizde bıznesti tsıfrlandyrýǵa, 300 myńnan astam shaǵyn jáne orta bıznestiń biliktiligin arttyrýǵa kómek kórsetedi.
Sonymen qatar Qazaqstannyń Ulttyq bankimen birlesip, «Tsıfrlyq teńge», «Jedel tólem júıesi», Open banking jobalaryn júzege asyrý isine saraptamalyq jáne tehnologııalyq turǵydan qoldaý kórsetý jumystary júrgizilip jatyr.
Prezıdenttiń Nıý-Iork qalasyna jumys sapary aıasynda Tsıfrlyq damý jáne aeroǵarysh ónerkásibi mınıstrligi men Mastercard kompanııasy arasynda osy jáne ózge de bastamalar qamtylǵan Digital Country Partnership (DCP) negizdemelik kelisimine qol qoıyldy.
Mastercard – álemniń 210 elindegi 2,3 mıllıardtan astam tutynýshyny biryńǵaı tólem júıesine qosqan jahandyq jetekshi tehnologııalyq kompanııa. Naryqtaǵy quny 390 mıllıard dollardan asatyn Mastercard álemdegi eń qymbat 10 brendtiń qataryna kiredi.
