Prezıdent mas júrgizýshilerdi qatań jazalaýdy tapsyrdy
ALMATY. QazAqparat – Memleket basshysy Qasym-Jomart Toqaev mas kúıinde avtokólik júrgizgenderdi qamap, iri kólemde aıyppul salýdy usyndy, dep habarlaıdy QazAqparat tilshisi.
Prezıdenttiń aıtýynsha, Almaty turǵyndar men qonaqtar úshin qaýipsiz qalaǵa aınalýy kerek.
«Elimizde, onyń ishinde Almatyda jol-kólik oqıǵalarynyń kóp tirkeletini alańdatady. Adamdar qaza taýyp, jaraqattanyp jatyr. Jol apatynan zardap shekkender sany basqa elderdegi qarýly qaqtyǵystardan qaza tabatyndardyń sanynan kem emes. Jol qozǵalysy mádenıeti aıtarlyqtaı tómendep ketti. Sondyqtan, keshendi sharalar qoldaný kerek. Alkogoldiń kez kelgen túrin kez kelgen mólsherde qabyldap, kólikti tizgindegeni úshin jazany qatańdatýdy zańnamaǵa engizýdi tapsyrdym. Bul esirtki men basqa da psıhotroptyq zattarǵa da qatysty», - dedi Prezıdent Almaty qalasyn damytý máseleleri jónindegi keńeste.
Sondaı-aq, Prezıdent mas nemese esirtki jáne basqa da psıhotroptyq zattardy qabyldaǵan soń sanaly túrde kólikke otyryp, jol erejesin buzǵandarǵa qatysty zań talaptaryn qataıtý týraly aıtty.
«Bul - azamattarymyzdyń zańdy quqyǵyna qarsy baǵyttalǵan aýyr qylmys. Mundaı qylmystyń aýyrlyǵyna baılanysty qamap, iri aıyppuldar salyp, avtokólikterin tárkilep, kólik júrgizý quqyǵynan ómir boıy aıyrý kerek», - dedi Memleket basshysy Qasym-Jomart Toqaev.
