Prezıdent: Mańyzdy mindetterdi júzege asyrý úshin energetıka salasyn túbegeıli jańǵyrtý kerek

ASTANA. KAZINFORM – Aqordada ótip jatqan saltanatty jıynda Memleket basshysy elimizdiń ósip-órkendep kele jatqanyna nazar aýdardy.

– Biz ekonomıkany jáne ınfraqurylymdy damytýǵa basa mán berip otyrmyz. Zamanaýı óndiris oryndaryn ashyp jatyrmyz. Elimiz jappaı tsıfrlandyrý jáne jasandy ıntellekt dáýirine qadam basty. Qazaqstan bolashaqta tolyqqandy tsıfrlyq el bolýǵa tıis. Osy maqsatqa jetý úshin aýqymdy jumys qolǵa alyndy. Astanada Halyqaralyq jasandy ıntellekt ortalyǵy quryldy. Jaqynda belgili amerıkalyq kompanııanyń tehnologııasy boıynsha jasalǵan sýperkompıýter iske qosyldy. Jahandyq úrdisterge saı jańa «data-ortalyqtar» salynady, «bultty» ınfraqurylym qalyptasady. Árıne, munyń barlyǵy energetıka salasy úshin úlken synaq bolmaq. Sondyqtan osyndaı mańyzdy mindetterdi júzege asyrý úshin energetıka salasyn túbegeıli jańǵyrtýymyz kerek, – dedi Qasym-Jomart Toqaev.

Prezıdent qazir osy baǵytta atqarylyp jatqan naqty jumystarǵa toqtaldy.

– Cońǵy alty jylda elektr energııasyn óndirý 16 mıllıard kılovatt-saǵatqa artty. Bul Qaraǵandy oblysy sııaqty óndirisi órkendegen aımaqtyń bir jyldaǵy qýat tutyný kólemimen birdeı. Qazirgi kezde Qazaqstannyń elektr energetıkasy júıesine jalpy qýaty 25 gıgavattan asatyn 237 elektr stantsııasy kiredi. Al is júzinde qoldanystaǵy jalpy qýat kólemi – 21 gıgavatt. Memleket júrgizip otyrǵan júıeli sharalardyń arqasynda energııa nysandary men ınjenerlik-kommýnaldyq jelilerdiń ornyqtylyǵy aıtarlyqtaı kúsheıdi. Ótken jylǵy jylytý maýsymynda tehnologııalyq aqaýlar 27 paıyzǵa qysqardy. Toǵyz jylý elektr ortalyǵy táýekeldiń «qyzyl» aımaǵynan shyqty, al úsh stantsııa «jasyl» aımaqqa ótti, – Memleket basshysy.

Aıta keteıik, Qasym-Jomart Toqaev energetıka salasy qyzmetkerlerin kásibı merekesimen quttyqtady.