Prezıdent Mańǵystaý oblysynyń ákimine týrızmdi damytýdy tapsyrdy
«Búgingi tańda Mańǵystaý oblysy iri kólik-logıstıkalyq ortalyqqa aınalǵanyn kórip otyrsyzdar. Kaspııdegi eki zamanaýı port birin-biri ózara tolyqtyryp otyrady. Aqtaý qalasy men porttar Qazaqstannyń biregeı teńizge shyǵatyn joly men terezesi bolyp sanalady. Sondyqtan memleket qarajatty aıamaı, osy jerde qajetti jumystardy uıymdastyrdy. Mańǵystaý oblysynda kóliktiń barlyq túri, ıaǵnı áýe, temirjol, avtomobıl jáne keme kóligi bir jerge toǵysyp otyr. Munyń ózi damýdyń jańa múmkindikterin ashyp, oblys áleýetin arttyrady. Sony tıimdi paıdalaný kerek», - dedi N. Nazarbaev.
Sonymen qatar Elbasy óńir basshylyǵy aldyna týrızmdi damytý mindetin júktedi.
«Endigi isteıtin sharýamyz týrızmdi damytýǵa qatysty. Osy oraıda Kaspıı jaǵalaýynda týrısterdiń demalýyna tıisti jaǵdaılardy jasaý qajet. Sol arqyly halyqtyń áleýeti kóterilýi tıis. Biz munaı men gazdan basqa ómir súretin baǵyt joq degen túsinikten basqa jaqqa bet buryp, jastarǵa jańa mamandyqtardy úıretýimiz kerek. Qazir dúnıejúzi ekonomıkasynyń 60-70 paıyzy - servıste. Sondyqtan jastarymyzdy myna porttarda, joldarda jumys isteýge, kólikterge qyzmet kórsetýge úıretýimiz qajet. Bul jerlerde qyrýar jumys oryndary bar», - dedi Memleket basshysy. 
Bul turǵyda Prezıdent ákimdik pen memleket tıisti jaǵdaıdy jasaıtynyn atap ótti.
«Kólik-logıstıka júıesiniń damýy - halyqtyń kózqarasyn ózgertip, jańa kásip túrlerin meńgerýge múmkindik beredi. Sol jańa mamandyqtardy úırený úshin oqý oryndaryn ashýymyz kerek. Jastarǵa munaı salasymen qatar, jańa mamandyqtardy meńgertken jón. Ákimdikter eńbek etýshilerdiń ındýstrııa men qyzmet kórsetýdiń jańa salalaryna beıimdelýin qamtamasyz etýi tıis. Jergilikti atqarýshy organdar oblysta jańa jumys oryndaryn ashyp, shaǵyn jáne orta bıznestiń damýyna jaǵdaı jasaýy kerek. Úkimetke oblys ákimimen birlesip, mýltımodaldyq habtar - «Quryq», «Aqtaý» porttary tóńireginde qosymsha óndirister men servıstik sektorlardy damytýdyń keshendi josparyn ázirleýdi usynamyn», - dep túıdi Nursultan Nazarbaev.
