Prezıdent Mańǵystaýdaǵy kólik-logıstıka ınfraqurylymynyń damý barysymen tanysty
ASTANA. KAZINFORM – Qasym-Jomart Toqaev Qazaqstannyń tranzıttik áleýetin damytýda mańyzdy rólge ıe basty logıstıkalyq habtyń biri – Aqtaý halyqaralyq teńiz portyna bardy. Bul týraly Aqordanyń baspasóz qyzmeti habarlady.
Búginde atalǵan nysandaǵy kópmaqsatty zamanaýı termınal Shyǵys – Batys, Soltústik – Ońtústik baǵyttary boıynsha táýlik boıy júk tıeý men túsirý qyzmetin usynady. Porttyń halyqaralyq kólik dálizderiniń toǵysynda ornalasýy ulttyq jáne óńirlik logıstıkany nyǵaıtýda aıryqsha strategııalyq mánin kórsetedi.
Prezıdentke Mańǵystaý oblysynyń kólik-logıstıka ınfraqurylymyn damytý perspektıvasy, sonyń ishinde elimizdiń tranzıttik áleýetin keńeıtý jáne port qýatyn jańǵyrtý josparlary jóninde baıandaldy.
Kólik mınıstri Marat Qarabaev óńirde jalpy quny 1,9 trıllıon teńge bolatyn 24 ınfraqurylymdyq jobanyń júzege asyrylyp jatqanyn aıtty. Byltyr Transkaspıı halyqaralyq kólik dálizi boıynsha júk tasymaly 62 paıyzǵa ósip, 4,5 mıllıon tonnaǵa jetken. Atalǵan baǵytpen 358 konteınerlik poıyz, 27 myń avtokólik júk tasymaldaǵan. Eksport kólemi 3,2 mıllıon tonnany quraǵan. 2028 jylǵa deıin bul kórsetkishti 10 mıllıon tonnaǵa deıin jetkizý josparlanyp otyr.
Aqtaýda konteınerlik hab salynyp jatyr. Bul joba porttyń júk ótkizý qabiletin 140 myńnan 240 myń JFE-ge deıin ulǵaıtady.
Memleket basshysynyń tapsyrmasyna sáıkes, Kendirli kýrorty aımaǵynda jańa áýejaıdyń qurylysy bastaldy. Áýejaı saǵatyna 150 jolaýshyny qabyldaı alady. Kendirlini Almaty jáne Astana qalalarymen jalǵaıtyn turaqty áýe reısterin ashý josparlanǵan.
Budan bólek, Ortalyq – Batys jáne Beıneý – Sekseýil sekildi aýqymdy jol qurylysy jobalaryn júzege asyrý kózdelgen. Sonyń nátıjesinde basty baǵyttardaǵy logıstıkany ońtaılandyryp, tranzıt jáne eksport júkterin tasymaldaý shyǵyndaryn edáýir azaıtýǵa múmkindik týady. Atap aıtqanda, Astanadan Aqtaýǵa deıingi jol 800 shaqyrymǵa, al Qorǵastan Aqtaýǵa deıingi araqashyqtyq 900 shaqyrymǵa qysqarady.
Memleket basshysy Kendirli kýrorty aýmaǵyndaǵy áýejaı qurylysyn tezirek aıaqtaýdy tapsyrdy. Prezıdenttiń aıtýynsha, Qazaqstandy Eýrazııanyń kólik-logıstıka habyna aınaldyrý jolynda Mańǵystaýdyń alatyn orny erekshe. Sondyqtan onyń áleýetin tıimdi paıdalaný qajet. Óıtkeni bul mindettiń strategııalyq mańyzy zor.
