12:33, 01 Qyrkúıek 2022 | GMT +5
Prezıdent mandatynyń 7 jyldyq kezeńi kez kelgen baǵdarlamany júzege asyrýǵa jetkilikti –Toqaev
NUR-SULTAN. QazAqparat – Prezıdent mandatynyń 7 jyldyq kezeńi kez kelgen aýqymdy baǵdarlamany júzege asyrý úshin jetkilikti. Bul týraly Memleket basshysy Qasym-Jomart Toqaev Qazaqstan halqyna Joldaýy barysynda aıtty, dep habarlaıdy QazAqparat tilshisi.
«Men kóp oılanyp, Prezıdent ókilettigi merzimderiniń sanyn jáne uzaqtyǵyn qaıta qaraý qajet degen baılamǵa keldim. Prezıdent mandatyn uzaqtyǵy 7 jyldyq bir merzimmen shekteýdi usynamyn. Biraq qaıta saılanýǵa tyıym salynady», - dedi Memleket basshysy.
Osy oraıda Prezıdent bul bastamanyń negizine toqtaldy.
«Bir jaǵynan 7 jyl kez kelgen aýqymdy baǵdarlamany júzege asyrý úshin jetkilikti kezeń. Ekinshi jaǵynan Prezıdent mandatyn bir merzimmen shekteý Memleket basshysynyń jalpyulttyq damýdyń strategııalyq mindetterin sheshýge barynsha jumylýyn qamtamasyz etedi», - dedi Qasym-Jomart Toqaev.
Budan buryn habarlanǵandaı, Qasym-Jomart Toqaev bıyl kúzde kezekten tys Prezıdent saılaýyn ótkizýdi usyndy.