Prezıdent Malaızııa premer-mınıstri Anýar Ibragımmen kelissóz júrgizdi
ASTANA. KAZINFORM - Malaızııa delegatsııasymen keńeıtilgen quramda ótken kelissóz barysynda ózara tıimdi baılanystardy odan ári nyǵaıtýǵa basa mán berilip, ekijaqty kún tártibindegi birqatar ózekti másele qarastyryldy, dep habarlaıdy Aqordanyń baspasóz qyzmeti.
Memleket basshysy Qasym-Jomart Toqaev meımandarǵa iltıpat bildire otyryp, Premer-mınıstr Anýar Ibragımniń resmı saparynyń shyn máninde tarıhı máni bar ekenin, óıtkeni bul eki el arasyndaǵy yntymaqtastyqtyń jańa kezeńine jol ashatynyn atap ótti.
– Óz tarapymyzdan Ońtústik-Shyǵys Azııa óńirinde asa mańyzdy ról atqaratyn Malaızııamen anaǵurlym tyǵyz ári nátıjeli yqpaldastyq jasaýǵa daıyn ekenimizdi jetkizgim keledi. Jańa ǵana biz kóptegen másele boıynsha ashyq ári dostyq ráýishte pikir almastyq. Yntymaqtastyǵymyzdyń keleshegi zor ekenine senimdimin. Sizdiń bıznes-forýmǵa qatysý nıetińizdi quptaımyn. Іskerlik toptar arasyndaǵy baılanystar – ózara qarym-qatynasty damytýdyń mańyzdy faktory. Biz malaızııalyq kompanııalardyń qatysy bar jańa tabysty jobalardyń júzege asyrylýyn qoldaımyz. Bul rette Qazaqstan Úkimeti qajetti kómek kórsetýge daıyn. Budan bólek, eki eldiń azamattary men bıznesmenderi 30 kúndik vızasyz rejımniń jáne qolaıly tikeleı áýe qatynasynyń ıgiligin kórip otyr. Sonymen qatar 500-den asa qazaqstandyq stýdent Malaızııa ýnıversıtetterinde bilim alady. Olar eki el arasyndaǵy «altyn kópir» qyzmetin atqaratyny sózsiz, – dedi Prezıdent.
Anýar Ibragım Malaızııanyń Qazaqstanmen aradaǵy saýda-ekonomıkalyq yntymaqtastyqty nyǵaıtýǵa aıryqsha mán beretinin aıtty.
– Biz damyp kele jatqan ekonomıkalyq qatynastardan barynsha paıda taba alamyz. Naqty usynystarymyz bar. Mınıstrlerińizben ımport jáne eksport máseleleri jóninde ekijaqty kezdesý ótkizýdi josparlap otyrmyz. Malaızııanyń taýarlar naryǵy orasan zor. Qazirgi kezde bizdiń elimiz kompıýter chıpterin óndiretin óńirlik habqa aınaldy. Oǵan AQSh, Eýropa elderi, onyń ishinde Germanııa, sondaı-aq Qytaı aýqymdy ınvestıtsııa quıyp otyr. Biz óz tájirıbemizben bólisip, Sizdiń elde tabysty júzege asyrylǵan ózgeristerden úlgi alǵymyz keledi. Álbette, halal-ındýstrııa sekildi salalar da nazardan tys qalmaýy kerek. Sonymen qatar biz ıslam-bankınginiń perspektıvasyn qarastyramyz, – dedi Malaızııa Premer-mınıstri.
Kezdesý barysynda kólik-tranzıt, energetıka, qarjy jáne mádenı-gýmanıtarlyq salalardaǵy jan-jaqty seriktestiktiń múmkindikteri talqylandy.
Sonymen qatar taraptar BUU, IYU jáne AÓSShK sekildi halyqaralyq qurylymdar aıasyndaǵy yntymaqtastyqty nyǵaıtýǵa múddeli ekenin bildirdi.
