Prezıdent maqalasyndaǵy ıdeıalar aldymen jastarymyzǵa baǵyttalǵan – Aqylbek Kúrishbaev
Rektordyń aıtýynsha, Memleket basshysy óz maqalasynda Qazaqstan halqyn uly Abaıdyń muralary men eńbekterin qaıta zerdeleýge, parasat-paıymyn qajetimizge jaratýǵa shaqyra otyryp, qazaq qoǵamyn damytýdyń aldaǵy júzjyldyqtaǵy mańyzdy basymdyqtaryn aıqyndap berdi.
«Ulan-ǵaıyr jer men baı tabıǵı resýrstardy ıelengen Qazaqstan damýdyń jarqyn bolashaǵyna ıe. Biraq, ony ıgerý úshin elimizge sapaly damyǵan adam kapıtaly qajet. Bul jóninde kezinde Abaı dóp basyp aıtqan. Prezıdent qoǵamnyń ıntellektýaldy qýatyn qalyptastyrý men arttyrýdy, adam kapıtaly ıdeıasyn damytýdy óz maqalasyna arqaý etip alýy kezdeısoqtyq emes. Uly oıshyl eńbekterinde ǵylym men bilimge asa mán berýi – damýdyń negizi osylar ekendigin túısingendiginde. Osyny uǵyna otyryp, Prezıdentimiz Q.K.Toqaev bilim júıesin modernızatsııalaý reformasyn qolǵa aldy», - deıdi ol.
A.Kúrishbaev atap ótkendeı, búginde bul tek sóz júzinde ǵana emes, naqty qadamdarǵa, ulttyq bilim berý isi men otandyq ǵylymdy qoldaý men damytýǵa baǵyttalǵan shynaıy baǵdarlamalardyń júzege asýyna sep bolyp otyr.
«Nátıjesinde ótken jyly bakalavrıat pen magıstratýraǵa bólinetin memlekettik granttyń úlesi artsa, onyń ishinde tehnıkalyq, agrarlyq jáne aqparattyq tehnologııalar mamandyqtaryna granttar sany kóbeıdi. Bıylǵy oqý jylynan bastap bólingen memlekettik garanttyń quny 349-dan 778 myń teńgege deıin ósti. Óz kezeginde bul, JOO-nyń materıaldyq bazasynyń jaqsarýyna jáne kadrlardy daıyndaý sapasynyń joǵarylaýyna septigin tıgizdi. 2025 jyly memleket ǵylymı zertteýlerdi qarjylandyrýdy 10 esege arttyrýdy kózdep otyr. Nátıjesinde otandyq ǵalymdardyń ǵylymmen alańsyz aınalysýyna jáne elimizde biliktiligi joǵary kadrlardy daıyndaýǵa dańǵyl jol ashylatyny sózsiz», - dedi rektor.
JOO basshysy qazaqstandyqtar memleket berip otyrǵan múmkindikterdi tolyǵymen paıdalanýy kerektigin tilge tıek etti.
«Aıta keterligi, Prezıdent maqalasyndaǵy kóterilgen ıdeıalar aldymen, bizdiń jastarymyzǵa baǵyttalǵan. Memleket basshysy maqalada Abaıdyń »Tolyq adam« tujyrymyn jáne onyń tulǵanyń qalyptasý ıdeıasyn negizge ala otyryp, jas urpaqtyń aldyna mańyzdy mindetter qoıdy, ıaǵnı, bilimdi, mádınetti, zııaly, adamgershiligi joǵary adam bolyp qalyptasý. Tek osyndaı adam ǵana memlekettiń, qoǵamdyq, bolmasa otbasylyq-turmystyq ómirdiń irgeli qorǵany bola alady. Bul turǵyda joǵary oqý oryndary ustazdarynyń mindeti stýdentterdi ózin-ózi jetildirýge talpyndyrý, sonymen birge jahandaný jaǵdaıynda rýhanı-adamgershilik qundylyqtardan aırylmaý syndy uly Abaıdyń ómirlik ustanymdaryn basshylyqqa ala otyryp tárbıeleý», - dep túıindedi ol.
Eske sala ketsek, «Egemen Qazaqstan» gazetiniń 9 qańtar kúngi sanynda QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jarııalanǵan bolatyn.
