Prezıdent maqalasynda qoǵamdy alańdatqan máseleler boıynsha suraqtarǵa naqty jaýap bar – Máýlen Áshimbaev
«Memleket basshysynyń «Egemen Qazaqstan» gazetine jarııalanǵan «Táýelsizdik bárinen qymbat» atty maqalasyn erekshe yqylaspen oqyp shyqtym. Prezıdentimiz búginge deıingi jetistikterimizdi oı eleginen ótkizip, aldaǵy maqsat-mindetterge nazar aýdarǵan eken. Memlekettilikti nyǵaıtý, táýelsizdikti saqtaý, ultty ulyqtaý baǵyttary boıynsha tıisti organdarǵa naqty tapsyrmalar da berilgen. Sondyqtan bul eńbekti baǵdarlamalyq qujattyń júgin arqalaǵan dúnıe deýge tolyq negiz bar. Maqalada egemen elimizdiń baǵyt-baǵdary, qoǵamdy alańdatqan ózekti máseleler, jahandaný dáýirindegi jańa syn-qaterler boıynsha suraqtarǵa naqty jaýap berilgen. Ásirese, memlekettiń jerine qatysty keltirilgen paıymdar halyq tarapynan tolyq qoldaý tabýda. Memleket basshysy atap ótkendeı, shyn máninde, bizge osynaý ulan-ǵaıyr aýmaqty syrttan eshkim syıǵa tartqan joq. Bul jer – ejelden qazaqtyń ata qonysy, qasterli mekeni», - dep jazdy Senat spıkeri Facebook paraqshasynda.
Onyń atap ótýinshe, memlekettik tildi damytýǵa, qandastar kóshin ári qaraı jandandyrýǵa, shekara mańyndaǵy aýyldardy órkendetýge qatysty aıtylǵan usynystar jurtshylyqtyń erekshe qyzyǵýshylyǵyn týdyryp otyr. Oǵan maqala jarııalanǵaly beri buqaralyq aqparat quraldary men áleýmettik jelilerde aıtylyp, jazylyp jatqan pikirler aıqyn dálel. Naýryz meıramyn atap ótýdiń jańa tujyrymdamasyn daıyndaý bastamasy da halyqtyń bereke-birligin nyǵaıtý jolyndaǵy mańyzdy qadam ekeni anyq. Prezıdentimizdiń Alash arystarynyń asyl murasyn ıgerý jalǵasa beretini týraly aıtqan sózi de kópshiliktiń kóńilinen shyqqany daýsyz.
«Maqalada jazylǵandaı, bıyl Táýelsizdigimizdiń 30 jyldyǵymen birge azattyqtyń aq tańyn jaqyndata túsken Jeltoqsan oqıǵasynyń 35 jyldyǵyn atap ótemiz. Halqymyzdyń basynan ótken alapat asharshylyqtyń alǵashqy kezeńi – 1921-1922 jyldardaǵy náýbetten beri de 100 jyl ótti. Sondaı-aq, álemdik shejirede teńdessiz sheshim bolyp sanalatyn Semeı polıgonynyń jabylǵanyna 30 jyl tolady. Munyń bári bizdiń tarıhymyz. Al, tarıhty dáripteý – barshamyzdyń abyroıly mindetimiz. Sol sebepti, Prezıdentimiz ultymyzdyń ótkenine táýelsiz kózqaraspen qaraıtyn kez kelgenin, ǵalymdarymyz ben tarıhshylarymyz bul baǵytta aýqymdy jumys atqarý qajettigin naqty atap ótti. Osy oraıda Memleket basshysynyń fılm túsirý isinde tarıhı taqyryptarǵa basymdyq berý týraly tapsyrmasynyń mańyzy zor. Jasyratyny joq, biz el, jer, Otan týraly sóılegende keıde jalań uranǵa boı aldyryp jatamyz. Prezıdentimiz maqalada osy máselege nazar aýdaryp, qazir sózben emes, ispen dáleldeıtin kezeń ekenine basa mán bergen. Sonyń ishinde qorshaǵan ortany qorǵaýǵa qatysty aıtylǵan oılar tabıǵatty aıalaýda ár azamat jaýapty ekenin jáne árkim naqty ispen úles qosý qajettigin anyq kórsetedi», - dedi Máýlen Áshimbaev.
Sonymen qatar ol Qasym-Jomart Kemeluly maqalada saıası-ekonomıkalyq reformalardyń da júıeli túrde jalǵasatynyn qadap aıtqandyǵyna nazar aýdartady.
«Osy baǵyttaǵy aýyl jáne kent ákimderin saılaý bastamasy elimizde saıası jańǵyrýdyń jańa kezeńine jol ashady dep senemiz. Prezıdentimiz aıtqandaı, bizdiń maqsatymyz – keler býynǵa Qazaqstandy tuǵyry berik, ekonomıkasy qýatty, rýhy asqaq memleket retinde tabystaý jáne sol isterdi laıyqty jalǵastyratyn jasampaz urpaq tárbıeleý. Mundaı jumystarǵa árqaısymyz atsalysýymyz qajet. Osylaısha, Memleket basshysy atalǵan maqala arqyly memlekettilikti kúsheıtýge jáne ıdeologııalyq jumystarǵa qatysty elimizdiń aldynda turǵan negizgi basymdyqtardy anyqtap berdi. Bul baǵyttaǵy barlyq bastamany tabysty iske asyrý úshin Senat zańnamalyq turǵydan qoldaý kórsetýge, táýelsizdigimizdiń qadir-qasıetin arttyrýǵa jáne eldigimizdi eńseli etýge óz úlesin qosatyn bolady», - dedi Senat Tóraǵasy.
