Prezıdent maqalasy rýhanı jańǵyrýdyń kemeldenýin tezdetedi - Ýálıhan Qalıjanov
Fılologııa ǵylymdarynyń doktory Ýálıhan Qalıjanovtyń aıtýynsha, Elbasynyń bul maqalasy Qazaqstan qoǵamynyń barlyq toptaryna áser etti.
«Nursultan Nazarbaev kezinde «rýhy myqty halyq qana myqty memleket qura alady» dep jazǵan edi. Sol halyq rýhyn kóterý úshin, eń aldymen, ózi súıgen, ózin súıgen ultynyń tarıhyna úńildi. 1994 jyly jazǵan «Tarıh tolqynynda» atty kitabynda «el Prezıdenti retinde óz halqymnyń keminde bes myń jyldyq tarıhyn bilýim kerek» dep edi. Ári qazaq rýhanııaty órkenıetiniń negizgi 12 jolyn ashyp kórsetti. Árıne, buǵan taǵy bir saıası, teńdessiz sheshim - Qazaqstannyń Egemendigin jarııalaýyn qosaıyq. Sondaı-aq, egemen el qurýdaǵy Qazaqstan damýynyń Prezıdenttik basqarý júıesi jáne Nazarbaev fenomeni bar», - dedi ǵalym.
Sarapshynyń aıtýynsha, Memleket basshysy Uly dala órkenıetiniń jeti qyryn júzege asyrý joldaryn anyq kórsetken.
«Elbasy atqa miný mádenıetine qatysty sózben ǵana aıtyp qoımaı, ony at ábzelderimen, áskerdiń kıgen kıimderimen úılestire zertteý kerektigin aıtty. Bul, arnaýly ǵylymı tyqyrypqa suranyp otyr. Uly daladaǵy ejelgi metallýrgııa dala órkenıetiniń tehnologııasy bar ekendigin kórsetti. Endeshe, ony ǵylymı-tanymdyq turǵydan zerdelep, halyqqa jetkizý mindeti tur. Elbasy álemdik órkenıette erekshe orny bar ań stılin ulttyq bolmys, keńistik pen ýaqyt ólshemderin eskere otyryp baǵamdaýǵa shaqyrady. Altyn adamnyń altynmen aptalǵan kıimderi ejelgi sheberlerdiń altyn óńdeý tehnıkasyn jaqsy meńgergenin ańǵartady. Sonymen birge bul jańalyq dala órkenıetiniń zor qýaty men estetıkasyn áıgileıtin baı mıfologııany pash etti. Kúmis keseden tabylǵan jazý da áli oqyla qoıǵan joq. Oqylǵanmen, ol ǵylymı toqtam retinde moıyndalmady. Bul da lıngvıster aldynda turǵan úlken mindet. Túrki ımperııasynyń aýmaǵyn qamtyǵan kóne Jibek joly jahandaný zamanynda qandaı transformatsııaǵa ushyrap otyr? Onyń Qazaqstan ekonomıkasynyń damýyna qandaı úles ákelgenin sana, ekonomıkalyq, rýhanı-mádenı turǵyda saraptaý qajet. Buǵan ǵalymdar óz sózin aıtýy kerek dep bilemin», - dedi fılolog.
Sarapshy ult tarıhy men órkenıetin sanaǵa sińirý ulttyq patrıotızmdi damytyp, óz ultyna, óz memleketine degen qurmet pen maqtanysh sezimin qalyptastyratynyn aıtty.
«Elbasynyń maqalasy rýhanı jańǵyrýdyń kemeldenýin tezdete túsedi. Óıtkeni bul maqaladaǵy oılarmen tujyrymdar «Mádenı mura», «Halyq tarıh tolqynynda», «Bolashaqqa baǵdar: rýhanı jańǵyrý» jobalarynyń zańdy jalǵasy bolyp tabylady. - dedi ol.
Eske salaıyq, QR Prezıdenti Nursultan Nazarbaev «Uly dalanyń jeti qyry» atty maqalasyn jarııalaǵan bolatyn.
