Prezıdent mádenıet jáne óner salasy mamandaryna alǵys bildirdi
ASTANA. KAZINFORM — Búgin Aqordada Memleket basshysy Qasym-Jomart Toqaev mádenıet jáne óner qyzmetkerlerin kásibı merekelerimen quttyqtady.
— Bul — elimiz úshin mán-mańyzy aıryqsha mereke. Mádenıet halqymyzdyń ulttyq bolmysy men rýhanı derbestigin arqaý etkenin bárimiz jaqsy bilemiz. Mádenı jáne rýhanı dúnıesin saqtaı bilgen eldiń mártebesi bıik, mereı ústem bolary aıqyn. Sizder osy ıgi maqsat jolynda tabandy jumys istep kelesizder. Qoǵamymyz bul eńbekti joǵary baǵalaıdy. Búgin men kásibı mereke kúni elimizdegi barsha mádenıet jáne óner salasy mamandaryna shynaıy alǵysymdy bildiremin, — dedi Prezıdent.
Memleket basshysy qazaq ónerdiń kıesin uǵatyn, ónerpazdyń qadirin biletin jurt ekenin basa aıtty.
— Biz erekshe daryn ıelerine árdaıym laıyqty qurmet kórsetemiz. Jurtymyz «ónerdiń órisi keń» dep sizderdi qashanda qadirlegen. Mine, búgingi jıyn da sonyń bir kórinisi. Shyn máninde rýhanııaty baı eldiń oıy ozyq, bolashaǵy jarqyn bolady. Ózderińizge málim, qazir Qazaqstanda aýqymdy ózgerister bolyp jatyr. Bul jaı ǵana ózgerister emes. Elimizdiń bolashaǵyna tikeleı qatysy bar, maǵynasy aýqymdy, tereń, keshendi, júıeli reformalar jasalyp jatyr. Maqsatymyz — Otanymyzdy kúshti ozyq memleket retinde damytý, sondaı-aq daryndy, otanshyl, jigerli jáne kózi ashyq, kókiregi oıaý jastardyń ómir jolyn ashyp berý, — dedi Qasym-Jomart Toqaev.
Aıta ketelik Premer-mınıstriniń orynbasary – Mádenıet jáne aqparat mınıstri Aıda Balaeva mádenıet jáne óner qyzmetkerlerin kásibı merekesimen quttyqtaǵan edi.
