Prezıdent: Týrızm saıasatyn ózara tıimdi úılestiretin ýaqyt jetti

TAShKENT. KAZINFORM — Memleket basshysy Ózbekstan Prezıdentin Samarqand qalasynda ıÝNESKO-nyń Bas konferentsııasyn tabysty ótkizýimen quttyqtady. Bul týraly Aqordanyń baspasóz qyzmeti habarlady. 

Qasym-Jomart Toqaevtyń pikirinshe, mádenı-gýmanıtarlyq baılanystardy nyǵaıtý óńir elderi úshin negizgi basymdyq sanalady.

Prezıdent ortaq tarıhı-mádenı murany saqtaýdyń, ulttyq qolónerdi nasıhattaý jáne turaqty túrde birlesken is-sharalar uıymdastyrýdyń mańyzyna nazar aýdardy.

Kınematografııa salasynda, sondaı-aq zamanaýı týrıstik klasterler qurý jáne jańa tehnologııalardy paıdalaný arqyly Uly Jibek jolynyń murasyn dáripteýde birshama is tyndyrýǵa bolady.

– Osy salada barynsha belsendi áreket etip, týrızm saıasatyn ózara tıimdi úılestiretin ýaqyt jetti dep oılaımyn. Buǵan deıin búkil óńirge ortaq týrıstik baǵdarlardy damytý týraly usynys aıtylǵan edi. Biz mundaı bastamalardy qoldaımyz. Budan bólek, Ortalyq Azııanyń birtutas týrıstik brendin ilgeriletýde pármendi sharalar qabyldaýdy usynamyz. Týrızm salasyndaǵy yntymaqtastyq týraly kelisim jáne Ortalyq Azııa elderiniń biryńǵaı týrıstik keńistigin qalyptastyrý atalǵan saladaǵy baılanystarymyzdy jandandyrýǵa quqyqtyq negiz bola alady, – dedi Prezıdent.

Qasym-Jomart Toqaev Tashkenttegi Islam órkenıeti ortalyǵynan alǵan áserimen bólisip, Shavkat Mırzıeevtiń atalǵan mekemeni ǵylymı-zertteý jumystary júrgiziletin ortaq alańǵa aınaldyrý jónindegi bastamasyn qoldady. 

Aıta ketelik Qasym-Jomart Toqaev Ortalyq Azııa memleketteri basshylarynyń VII konsýltatıvtik kezdesýine qatysý úshin Tashkenttegi Kongress ortalyqqa barǵanyn jazǵan edik.