Prezıdent Eýrazııa ulttyq ýnıversıtetiniń Stýdentter úıine bardy
ASTANA. KAZINFORM - Memleket basshysy Eýrazııa ulttyq ýnıversıtetiniń stýdentteri men magıstranttaryna jáne doktoranttaryna arnalǵan 2656 oryndyq jańa jataqhanany aralap kórdi.
Memleket-jekemenshik seriktestigi negizinde salynǵan Stýdentter úıi úsh zamanaýı bloktan turady. Olardyń árqaısysy stýdentterdiń jaıly turmysy men bilim alýyna múmkindik beretin kovorkıng aımaqtarmen, kitaphanalarmen, sporttyq jáne kommertsııalyq oryndarmen jabdyqtalǵan.
Jataqhana qurylysynda erekshe qajettiligi bar stýdentterdiń de talap-tilegi eskerilgen. Onyń dızaıny men ınfraqurylymy kedergisiz orta qalyptastyrý talaptaryna saı keledi.
Ǵylym jáne joǵary bilim mınıstri Prezıdentke stýdentterdi jataqhanamen qamtamasyz etý, elimizde sheteldik joǵary oqý oryndarynyń fılıaldaryn ashý arqyly akademııalyq hab qurý sharalary jóninde baıandady.
Qasym-Jomart Toqaev bul baǵytta júrgizilip jatqan jumystardy oń baǵalap, bilim berý salasyndaǵy jáne jastar arasyndaǵy halyqaralyq yntymaqtastyqtyń mańyzdy ekenine nazar aýdardy. Sondaı-aq jurtty alańdatqan metapnevmovırýs týraly pikir bildirdi.
– Qazir bári jańa ınfektsııa týraly aıtyp jatyr. Menińshe, odan dańǵaza jasaýdyń qajeti joq. Sondyqtan Qytaımen yntymaqtastyqty odan ári damytýymyz kerek, – dedi Memleket basshysy.
Memleket basshysy jataqhanada stýdenttermen áńgimelesip, Ana tili gazetine bergen suhbatynda aıtqanyndaı, elimizde tsıfrlandyrý men jasandy ıntellektti damytýǵa erekshe mán beriletinin, bul ozyq tehnologııalar ár salaǵa engiziletinin jetkizdi. Prezıdent bul rette jastarǵa aıryqsha úmit artatynyn atap ótti.
Jalpy byltyr el aýmaǵynda 11 079 oryndyq 40 jataqhana paıdalanýǵa berilgen. Bıyl Astana qalasynyń ózinde 3400 oryndyq 7 jataqhanany iske qosý josparlanyp otyr.
Búginde L.N.Gýmılev atyndaǵy Eýrazııa ulttyq ýnıversıtetinde 4280 stýdentke arnalǵan segiz Stýdentter úıi bar. Sonymen qatar segiz jeke jataqhanamen yntymaqtastyq týraly memorandýmdar jasalǵan. Bıyl Stýdentter úılerindegi oryn sany 10 myńǵa deıin ulǵaıdy. Bul stýdentterdi jatyn orynmen qamtamasyz etý máselesin tolyǵymen sheshýge múmkindik berdi.
Osyǵan deıin Memleket basshysy QazSwimAcademy sport ortalyǵynyń jumysymen tanysty.
