Prezıdent qyzanaq pen kóshet ósirýge mamandanǵan «Lst Agro» JShS jylyjaı keshenin aralap kórdi
Jylyjaı kesheniniń jalpy aýmaǵy – 7 gektar. Onda jylyna 3650 tonna qyzanaq ósiriledi. Keshenge 5,2 mıllıard teńge kóleminde ınvestıtsııa quıylǵan. Memlekettik qoldaý sharalary «Damý» qory arqyly kórsetiledi.
Prezıdentke kásiporynda tamshylatyp sýarý, tumandatý jáne kómirqyshqyl gazyn óndirý júıeleri jumys isteıtini týraly baıandaldy.
Jylyjaı keshenindegi sýarý quraldaryn, klımattyq jáne energetıkalyq jabdyqtardy basqarý júıesi tolyǵymen avtomattandyrylǵan, sondaı-aq ol arnaıy kompıýterlik baǵdarlama kómegimen júzege asyrylady. Munda sýdy tazartýdyń zamanaýı tehnologııasy da engizilgen.
Qyzanaq ósirýdiń ozyq gollandtyq ádisiniń nátıjesinde kompanııa ónim kólemin birneshe ese ulǵaıtyp, sapasyn joǵarylatýǵa qol jetkizdi. Ónimniń basym bóligi eksporttalady.
Keshendi aralap kórgen Memleket basshysy óndiriletin ónim túrlerimen tanysyp, jańa jumys oryndaryn ashý jáne azyq-túlik qaýipsizdigin saqtaý úshin osyndaı ınvestıtsııalyq jobalardy iske asyrý mańyzdy ekenin atap ótti.
