Prezıdent: Qytaımen shekarada tranzıttik júkter ótip, óz júgimiz qalyp qoıyp jatyr

NUR-SULTAN. QazAqparat – Reformalar jónindegi joǵary keńestiń kezekti otyrysynda Prezıdent Qasym-Jomart Toqaev Qytaımen shekarada qańtarylyp turǵan júk máselesine toqtaldy, dep habarlaıdy QazAqparat tilshisi.

Áýeli Saýda jáne ıntegratsııa mınıstri Baqyt Sultanovtyń eksportty ilgeriletýgen baǵyttalǵan sharalar týraly baıandamasyn tyńdaǵan Qasym-Jomart Toqaev shıkizat eksportyn ulǵaıtý Úkimettiń aldyndaǵy óte mańyzdy másele ekenin eskertti.

Ol úshin eksporttyń kólemin tejep turǵan kedergilerdi joıý, alys-beris geografııasy men nomenklatýrasyn keńeıtý baǵytynda Úkimettiń jumylyp jumys isteý qajettigi de aıtyldy.

Memleket basshysy ásirese Qytaımen eki aradaǵy shekaradan ózgeniń tranzıttik taýary ótkenimen, ózimizdiń taýar ótpeı jatqanynna alańdaýshylyq bildirip, Syrtqy ister mınıstrligin osy iske de atsalysýǵa shaqyrdy.

«Qazaqstannan Qytaıǵa júk ákelýge qoıylǵan shekteýlerge qatysty qordalanǵan másele uzaq ýaqyttan beri sheshilmeı keledi. Tranzıttik júkter ótedi, al bizdiń júkterimiz shekarada qalyp qoıady. Qazaqstandyq taýar tıelgen myńdaǵan vagon beketterde tur. Bıznes tikeleı Prezıdentten kómek suraıdy. Mundaı jaǵdaılarda Úkimet jedel áreket etip, seriktestermen aradaǵy barlyq máseleni retteýi tıis», – dedi Memleket basshysy.