Prezıdent «Qylmystyq atqarý júıesindegi úzdiksiz beınebaqylaý» jobasymen tanysty

ASTANA. QazAqparat - Memleket basshysyna «Qylmystyq atqarý júıesindegi úzdiksiz beınebaqylaý» jobasy tanystyryldy, dep habarlaıdy QazAqparat.

Prezıdent Qasym-Jomart Toqaevtyń tapsyrmasyna sáıkes qylmystyq atqarý júıesi mekemeleri úzdiksiz beınebaqylaýmen jaraqtandyrylyp jatyr. Búginde 52 mekemede 22 042 beınekamera ornatyldy. Jyl sońyna deıin 26 mekemede 13 822 beınekamera ornatylady.

«Atalǵan joba sottalǵandar jáne qyzmetkerler tarapynan jasalatyn quqyq buzýshylyqtardyń aldyn alýǵa baǵyttalǵan. Baqylaý naqty ýaqyt rejıminde júrgiziledi.

Júıe iske qosylǵaly beri tirkelgen quqyq buzýshylyqtar sany 40 paıyzǵa artty, 3 túrmeden qashý áreketine jáne 13 óz-ózine qol jumsaý áreketine tosqaýyl qoıyldy. Ókinishke qaraı, sottalǵandar ózderiniń zańsyz áreketteriniń izin jasyrý úshin beınebaqylaý kameralaryn isten shyǵarady. Olar jyl basynan beri 300-den asa beınekamerany syndyrǵan», - dep jazdy Aqordanyń áleýmettik jelidegi resmı paraqshasy.

Prezıdent beınebaqylaý júıesine nuqsan keltirgeni úshin qylmystyq jaýapkershilik engizýdi tapsyrdy.