Prezıdent Kýveıt Ámirin memlekettiń Ulttyq kúnimen quttyqtady

ASTANA. KAZINFORM – Qasym-Jomart Toqaev sheıh Mıshaal ál-Ahmad ál-Djaber as-Sabahty Kýveıt Memleketiniń Ulttyq kúnimen quttyqtady. Bul týraly Aqordanyń baspasóz qyzmeti habarlady.

Memleket basshysy jedelhatta Kýveıtti Taıaý Shyǵys pen ıslam álemindegi saıası jáne ekonomıkalyq turǵydan bedeldi el retinde baǵalaıtynyn jetkizdi. Sondaı-aq memleketterimiz arasyndaǵy dástúrli dostyq pen ózara qoldaýǵa negizdelgen san qyrly saladaǵy yntymaqtastyq qos halyqtyń ıgiligi úshin aldaǵy ýaqytta da qarqyndy damı beretinine senim bildirdi.

Qasym-Jomart Toqaev sheıh Mıshaal ál-Ahmad ál-Djaber as-Sabahtyń jaýapty qyzmetine tolaıym tabys, al baýyrlas Kýveıt halqyna baq-bereke tiledi.

Qasym-Jomart Toqaev SOP29 Dúnıejúzilik klımat sammıti aıasynda Kýveıttiń Taq murageri, sheıh Sabah Halıd ál-Hamad As-Sabahpen kezdesý ótkizgen bolatyn.