Prezıdent quttyqtaýynan keıingi Jańajyldyq beınebaıan qalaı túsirildi
ASTANA. KAZINFORM – Memleket basshysy Qasym-Jomart Toqaevtyń Jańajyldyq quttyqtaýynan keıin dástúrli túrde oryndalatyn ánuranǵa túsirilgen beınebaıan bıyl da erekshe boldy. Osyǵan oraı beınebaıan rejısseri Aqylbek Shaljanovqa habarlasyp, túsirilimniń qalaı júrgizilgenin surap bilgen edik.
- Jańajyldyq beınebaıandy eki bólimmen túsirdik. Birinshi – Memleket basshysy quttyqtaýynan keıin Prezıdent orkestri 50 mýzykantynyń súıemeldeýimen Qurmet qaraýylynyń 150 qyzmetkeri oryndaǵan ánuran, - dedi ol.
Rejısserdiń aıtýynsha, ekinshi bólimde dırıjer Dınara Tilendıeva men tanymal pıanıst Ratovich-tiń áýensiz kompozıtsııasy túsirildi. Bul kompozıtsııa barlyq telearnaǵa taratylyp, ár telearna jańajyldyq keshke arnalǵan mýzykalyq baǵdarlamalaryn osy kompozıtsııamen bastady.
- Bul beınebaıanda eki orkestrdi qostyq. Birinshisi – Otyrar sazy, ekinshisi – Astana Opera. Dınara men Ratovich-tiń túsirilimi eki kúnge josparlandy. Birinshi kúngi túsirilim tolyqtaı dalada júrgizildi. Aqordanyń aldyna Qurmet qaraýylynyń 100 jáne artyna 50 qyzmetkeri sap túzedi. Al Ratovich Aqordanyń artyndaǵy alańqaıda pıanınomen ánurandy oınady. Ekinshi kúngi túsirilim tek Aqordanyń ishinde boldy. Onda Otyrar sazy men Astana Opera orkestrleri ánurandy oryndady. Bul kezde Aqordanyń aldyna Qurmet qaraýylynyń 100 qyzmetkeri sap túzese, al ishinde 150 adam ánurandy shyrqady, - dedi rejısser.
Onyń atap ótýinshe, beınebaıan túsirilimniń úshinshi kúni rým týrǵa arnaldy.
- Bul kúni halyq kóre bermeıtin, bilmeıtin Aqordanyń ishindegi Memleket basshysy mártebeli meımandarmen shaǵyn jáne keńeıtilgen quramda kelissózder ótizetin zaldardy, kitaphanany, qysqy baqty, ǵımaratqa kire beristi kórsetýge tyrystyq. Muny bıylǵy túsirilimniń basty erekshelikteriniń biri desek, artyq aıtqandyq emes. ıAǵnı, halyqqa Aqordanyń esigin aıqara ashyp, beınebaıan arqyly saıahat jasaýǵa múmkindik berdik, - dedi ol.
Óz kezeginde Aqylbek Shaljanov taǵy bir erekshelikti atap ótti.
- Taǵy bir erekshelik – altyn jip. Jańa jyl merekelik kóńil kúı syılaıtyn erekshe kún bolǵandyqtan ertegi elementterin qostyq. ıAǵnı, áýeden tómen quldılaǵan altyn jip Aqordanyń basty esigi arqyly ishke enip, joǵaryda atap ótken rým týr kezinde ár zaldy kórsetip kele tazyǵa aınalady. Tazyny Aqordaǵa kirgizý sebebi – ulttyń jeti qazynasyn jańǵyrtý. Basqa ıt tuqymdaryna qaraǵanda óte taza, jaǵymsyz ıisi joq. Sondyqtan tek tazyny ǵana kıiz úıge kirgizgen. Odan keıin tazy búrkitke aınalý arqyly ǵımarattan ushyp shyǵyp, Aqordanyń tóbesine qonaqtaıdy. Búrkit – qazaq úshin kıeli qus. Týymyzda da beınelengen, - dedi A. Shaljanov.
Onyń atap ótýinshe, Prezıdent Teleradıokesheni ótken jyldan beri Memleket basshysynyń quttyqtaýynan keıingi ánurandy oryndaý sátin erekshe jasaýǵa tyrysyp keledi.
- Esterińizde bolsa, ótken jyly Dımash Memleket basshysynyń Jańajyldyq quttyqtaýynan keıin Aqordada ánurandy oryndap, kórermenge erekshe kóńil-kúı syılaǵan edi. Bıyl da osy deńgeıden tómen túspeýge tyrystyq. Teleradıokeshenniń shyǵarmashylyq ujymy bul beınebaıandy túsirýge búkil jan-dúnıesin saldy. Sondyqtan da kóziqaraqty kórermenniń kóńilinen shyqty dep oılaımyz, - dedi beınebaıan rejısseri.
Túsirilimge Prezıdent Teleradıokesheniniń 30-dan astam qyzmetkeri jumyldyryldy. Naqtyraq aıtqanda, «QR Prezıdenti teleradıokesheniniń» dırektory Raýshan Qajybaeva túsirilim barysyna tolyqtaı basshylyq jasady. Sonymen qatar Jibek Joly/Silk Way telearnasynyń basqarýshy dırektory Erkejan Kúntýǵan, Derekti fılmder ortalyǵynyń ujymy zor úles qosty. Prodıýseri - Álibek Qulaman, rejıserleri - Aqylbek Shaljanov, Almas Sátkenov, Zýhrab Otarov, montaj rejısseri – Qýanysh Abılmajınov.