Prezıdent: Qutqarýshylarymyz Ádiletti jáne Qaýipsiz Qazaqstandy qurýǵa mol úles qosyp jatyr

ASTANA.KAZINFORM - Prezıdent qutqarýshylar merekesinde TJM qyzmetkerleri, qutqarýshylar árqashan jáne ár kezde el qamyn oılap, azamattardyń qaýipsizdigin kúzetetinin atap ótti. Bul týraly Aqordanyń baspasóz qyzmeti habarlady.

Sondaı-aq azamattyq qorǵaý júıesin jańǵyrtýdyń keshendi jumystary jalǵasyp, qutqarýshylarǵa jan-jaqty qoldaý kórsetiletinin jetkizdi. Qazirgi jumys qarqynyn tómendetýge bolmaıdy. Óıtkeni azamattardyń ómiri men turmysy osyǵan tikeleı baılanysty.

– Ózgeniń ómirin saqtaý úshin óz basyn qaterge tigý – naǵyz erlik. Qıyndyqqa tap bolǵan jandar eń aldymen qutqarýshylardan kómek kútedi. Búginde azamattyq qorǵaý salasynyń qyzmetkerleri óz mindetin minsiz atqaryp keledi. Olar syn saǵatta janqııarlyq kórsetýge daıyn turady. Tipti, osy jolda qurban bolǵan erlerimiz az emes. Ótken otyz jylda 72 qutqarýshy erlikpen qaza tapty. Biz batyrlarymyzdyń esimin eshqashan umytpaımyz. Olar otanshyl jáne antqa adal bolýdyń tamasha úlgisin kórsetti. Sondyqtan ómirin qutqarý isine arnaǵan erlerdiń esimderin tarıhymyzda máńgi saqtaý úshin tıisti is-áreketterdi der kezinde qoldanýymyz kerek. Naǵyz erlik jasaǵan batyl azamattarymyzdyń rýhyna taǵzym ete otyryp, olardyń esimderin el ishinde ulyqtaı berýimiz qajet. Halqymyz «Eńbek erlikke jetkizer, erlik eldikke jetkizer» dep aıtqan. Túptep kelgende, qaısar rýhty qutqarýshylarymyz Ádiletti jáne Qaýipsiz Qazaqstandy qurýǵa mol úles qosyp jatyr, – dedi Memleket basshysy.

Aıta keteıik, Prezıdent qutqarýshylardy kásibı merekesimen quttyqtady.

Memleket basshysy qutqarýshy elimizdegi eń bedeldi mamandyqtyń birine aınalýǵa tıis ekenin aıtty.