Prezıdent: Qutqarý qyzmetiniń materıaldyq-tehnıkalyq áleýetin nyǵaıtý da – ózekti másele qatarynda
ASTANA. KAZINFORM - Prezıdent Qasym-Jomart Toqaev qutqarýshylarǵa memlekettik marapattar tapsyrý rásiminde keıingi bes jylda qutqarýshylar 75 myńnan astam jedel shaqyrtý boıynsha 240 myńǵa jýyq azamatqa kómek kórsetkenin atap ótti, dep habarlaıdy Aqordanyń baspasóz qyzmeti.
Sondaı-aq Qasym-Jomart Toqaev azamattyq qorǵanys salasyn damytý úshin ozyq tehnologııalardy engizý jáne materıaldyq-tehnıkalyq áleýetti nyǵaıtý mańyzdy ekenine nazar aýdardy.
– Keıingi bes jylda qutqarýshylarymyz 75 myńnan astam jedel shaqyrtý boıynsha 240 myńǵa jýyq azamatqa kómek kórsetti. Memleket azamattyq qorǵanys júıesin odan ári damytýǵa erekshe kóńil bólip otyr. Búginde bul salaǵa qoıylatyn talap túbegeıli ózgerýde. Eń basty mindet – apattyń aldyn alý. Sondyqtan osy salaǵa ozyq tehnologııany jáne jasandy ıntellektini engizý asa mańyzdy. Qutqarý qyzmetiniń materıaldyq-tehnıkalyq áleýetin nyǵaıtý da – ózekti másele qatarynda. Qazir bul baǵytta aýqymdy sharýa atqarylyp jatyr. Sońǵy úsh jylda 3 myńdaı tehnıka, sonyń ishinde jańa ushaqtar men tikushaqtar, san alýan qyzmet kórsetýge arnalǵan kemeler satyp alyndy. 60-qa jýyq órt sóndirý deposy men qutqarý stantsııasy salyndy. Tótenshe jaǵdaılar mınıstrliginiń osydan eki jyl buryn qurylǵan ahýaldyq ortalyǵy azamattyq qorǵanys júıesin basqarýǵa arnalǵan mańyzdy qurylymǵa aınaldy. Sonyń arqasynda turaqty baqylaý, qaýip-qaterdi aldyn ala boljaý, jedel sheshim qabyldaý jumysy oń nátıje bere bastady, – dedi Prezıdent.
Osyǵan deıin Prezıdent Qasym-Jomart Toqaev qutqarýshylarǵa memlekettik marapattar tapsyrdy.
