Prezıdent qurylys salasyndaǵy monopolııany synady

NUR-SULTAN. QazAqparat – QR Prezıdenti Qasym-Jomart Toqaev Úkimettiń keńeıtilgen otyrysynda kommertsııalyq naryqty da, memlekettik tapsyrysty da ýysynda ustap otyrǵan qurylys kompanııalaryn synǵa aldy, dep habarlaıdy QazAqparat tilshisi.

«Elimizde birneshe qurylys kompanııasy ǵana ústemdikke ıe bolyp otyr. Kommertsııalyq naryq ta, memlekettik tapsyrys salasy da solardyń qolynda. Shyn máninde olar buǵan ákimshilik resýrsty paıdalaný arqyly qol jetkizýde. Úkimetke Básekelestik qorǵaý jáne damytý agenttigimen birge qurylys naryǵyn monopolııasyzdandyrý jáne básekeli damýy boıynsha sharalar paketin ázirleýdi tapsyramyn», -dedi Memleket basshysy.

Prezıdent ondaı monopolıst kompanııalardyń aty belgili ekenin atap ótti.

«Tenderdi utyp alyp, ony qosalqy merdigerlerge beretin, olar taǵy basqa qosalqy merdigerlerge beretin kompanııalardyń ataýy belgili. Sondyqtan oǵan toqtalmaı-aq qoıaıyn», -dedi Prezıdent.