Prezıdent quryltaıda usynǵan jalpyulttyq qundylyqtar qandaı

ASTANA. KAZINFORM — Memlekettik keńesshi Erlan Qarın Atyraýda ótken ulttyq quryltaıdyń basty erekshelikterin atady. 

Onyń aıtýynsha, ulttyq quryltaıdyń Atyraýda ótken otyrysynyń basty ereksheligi — Memleket basshysy osyǵan deıin aıtqan ıdeologemalardy qoryta kele, jalpyulttyq qundylyqtardyń naqty tizimin usynǵanynda.

Bul — Táýelsizdik jáne Otanshyldyq, Birlik jáne Yntymaq, Ádildik jáne Jaýapkershilik, Zań jáne Tártip, Eńbekqorlyq jáne Kásibı biliktilik, Jasampazdyq jáne Jańashyldyq.

«Osy qundylyqtar tuǵyrnamasy memlekettiń bilim berý salasyndaǵy, óskeleń urpaq tárbıesindegi jáne mádenı-aǵartý jumysyndaǵy basty baǵdary bolady. Bul qundylyqtar qazirgi kezdegi ıdeologemalardy ǵana emes, sonymen birge bárimiz qalyptastyrýǵa tıis jańa áleýmettik etıkanyń kontýryn aıshyqtaıdy. Memleket basshysy quryltaıda sóılegen sózinde „Bizdiń aldymyzda úsh aıryq jol tur: quldyraý, toqyraý nemese órleý. Biz árdaıym órleýdi tańdaımyz“ dedi. Órleýge umtylý — eldiń damýyna kedergi keltiretin barlyq nárseden bas tartýdy ǵana emes, barsha azamattardyń ózin-ózi damytýǵa degen belsendi umtylysyn da bildiredi», — dep jazdy Erlan Qarın Telegram paraqshasynda.

Sondyqtan bul qundylyqtar, qoǵamda búkil elimizdiń jáne árbir azamattyń múddesin toǵystyratyn progressıvti minez-qulyq úlgilerin qalyptastyrýdy kózdeıdi.