Prezıdent Quryltaı kelisimimen qandaı laýazym ıelerin taǵaıyndaıdy — zań jobasy
ASTANA. KAZINFORM — «Qazaqstan Respýblıkasynyń Prezıdenti týraly» Konstıtýtsııalyq zań jobasynda Prezıdenttiń Quryltaı kelisimimen qandaı laýazym ıelerin taǵaıyndaıtyny naqty belgilengen. Bul týraly Parlament palatalarynyń otyrysynda atalǵan qujatty talqylaý barysynda Májilis depýtaty Janarbek Áshimjan aıtty.
— Konstıtýtsııalyq zańnyń jobasy Qazaqstan Respýblıkasynyń Konstıtýtsııasyna sáıkes Qazaqstan Respýblıkasy Prezıdentiniń jáne Qazaqstan Respýblıkasy Vıtse-Prezıdentiniń quqyqtyq jaǵdaıyn aıqyndaıdy, sondaı-aq Qazaqstan Respýblıkasynyń barlyq memlekettik bılik sýbektilerine qatysty Prezıdent ókilettikterin reglamentteıdi. Qazaqstan Respýblıkasynyń Prezıdenti — Memleket basshysy, memleketimizdiń ishki jáne syrtqy saıasatynyń negizgi baǵyttaryn aıqyndaıtyn joǵary laýazymdy tulǵasy bolyp tabylady jáne el ishinde jáne halyqaralyq qatynastarda Qazaqstan atynan ókildik etedi, — dedi ol.
Depýtattyń aıtýynsha, Prezıdent halyq pen memlekettik bılik birliginiń, Konstıtýtsııa myzǵymastyǵynyń, adam men azamattyń quqyqtary men bostandyqtarynyń sımvoly ári kepili bolyp qala bermek. Qazaqstan Respýblıkasynyń Vıtse-prezıdentin Quryltaıdyń kelisimimen Prezıdent qyzmetke taǵaıyndaıdy jáne Prezıdenttiń tapsyrmasy boıynsha Quryltaımen, Úkimetpen jáne ózge de memlekettik organdarmen ózara is-qımyl jasaý kezinde onyń atynan ókildik etedi.
— Zań jobasyna sáıkes Prezıdent Bas prokýrordy, Konstıtýtsııalyq sottyń, Ulttyq qaýipsizdik komıtetiniń, Joǵary aýdıtorlyq palatanyń, Ortalyq saılaý komıssııasynyń, Ulttyq banktiń tóraǵalaryn, Adam quqyqtary jónindegi ýákildi jáne Memlekettik kúzet qyzmetiniń bastyǵyn jeke ózi taǵaıyndaıdy. Prezıdent Quryltaımen kelisý boıynsha Vıtse-Prezıdentti, Premer-Mınıstrdi, Konstıtýtsııalyq Sottyń 10 sýdıasyn, Joǵary aýdıtorlyq palatanyń 8 múshesin, Ortalyq saılaý komıssııasynyń 6 múshesin, sondaı-aq Joǵarǵy Sottyń sýdıalaryn taǵaıyndaıdy jáne saılaıdy. Ókilettikterdiń osylaısha bóliný tártibin oryndy dep esepteımiz, óıtkeni Prezıdentimiz eldiń damý vektorlaryn aıqyndaıtyn Memleket basshysy bola otyryp, atalǵan organdardyń basshylaryn belgilengen strategııalyq baǵytqa súıenip taǵaıyndaıdy, — dedi Janarbek Áshimjan.
Aıta keteıik, Parlament talqylap jatqan zań jobasyna sáıkes, Vıtse-Prezıdentti Quryltaı kelisimimen Prezıdent taǵaıyndaıdy.
