Prezıdent Quryltaı depýtattaryna: Jurt eldegi reformalardyń qanshalyqty nátıjeli bolǵanyn qyzmetterińizge qarap baǵalaıdy
ASTANA. KAZINFORM – Depýtattar zań qabyldaýmen qatar, jańa qoǵamdyq etıkany dáripteýge úles qosýǵa tıis. Bul týraly birinshi shaqyrylymdaǵy Quryltaıdyń birinshi sessııasyn ashqan Memleket basshysy Qasym-Jomart Toqaev aıtty.
- Túptep kelgende, Quryltaı elimizdiń zańnamalaryn zaman talabyna saı jańǵyrtýy kerek. Ulttyq múddeni, jurtshylyqty tolǵandyratyn máselelerdi jáne qazirgi álemdik úrdisterdi eskere otyryp, bul jumysty jedel ári sapaly atqarǵan jón. Biz qazir qoǵamda jańa qundylyqtardy ornyqtyryp jatyrmyz. Bul – kúrdeli, asqan uqyptylyqty talap etetin óte qajetti jumys. Jańa etıkany qalyptastyrý isi el aldyndaǵy azamattardyń, sondaı-aq memlekettik qyzmetshilerdiń júris-turysyna, minez-qulqyna baılanysty ekeni sózsiz, - dedi Qasym-Jomart Toqaev.
Memleket basshysynyń atap ótýinshe, qoǵamdyq oryndarda keleńsiz, jónsiz áreketterge jol bermeý qajet.
- Depýtattar zań qabyldaýmen qatar, jańa qoǵamdyq etıkany dáripteýge úles qosýǵa tıis. Bul da – ulttyq múddege tikeleı qatysy bar mańyzdy másele. Jalpy, jurtymyz eldegi reformalardyń qanshalyqty nátıjeli bolǵanyn, eń aldymen, sizderdiń qyzmetterińizge qarap baǵalaıdy, - dedi Prezıdent.
Sessııa barysynda Memleket basshysy Quryltaı bılik júıesin túbegeıli jańǵyrtatynyn atap ótti.
