Prezıdent Quryq portynda Qytaımen birlesken júk termınalyn qurýdy usyndy

ASTANA. KAZINFORM — Memleket basshysy Qasym-Jomart Toqaev Táýelsizdik saraıyndaǵy «Ortalyq Azııa-Qytaı» sammıtinde Quryq portynda Qytaımen birlesken júk termınalyn qurýdy usyndy.

— Transkaspıı baǵytynyń tartymdylyǵyn arttyrý úshin biz Kaspıı teńizi porttaryn jańǵyrtý jáne tsıfrlandyrý, júk termınaldaryn salý, kólik kemeleriniń óndirisin jolǵa qoıý jóninde júıeli sharalar qabyldap jatyrmyz. Kaspııdegi Quryq portynda Qytaımen birlesken júk termınalyn qurý máselesin qarastyrýdy usynamyz, — dedi Memleket basshysy.

Prezıdenttiń sózinshe, Qazaqstandaǵy kólik beketteriniń ótkizý qýatyn arttyrý, logıstıkanyń ınfraqurylymdy odan ári keńeıtý, zamanaýı júk tasymalyn damytý baǵytyndaǵy jobalar Qytaı taraby belsendi qoldaý kórsetip otyr.

— Dostyq-Moıynty ýchaskesinde kólik qozǵalysynyń ashylýy, Almaty qalasynda Jetisý iri konteınerlik termınaldyń jáne Aqtaý portynda konteınerlik habtyń qurylýy bul baǵyttaǵy basty jetistikter boldy, — dedi Qasym-Jomart Toqaev.

Aıta keteıik, elordadaǵy Táýelsizdik saraıynda «Ortalyq Azııa — Qytaı» ІІ sammıti ótip jatyr. 

Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.

«Ortalyq Azııa — Qytaı» І sammıti 2023 jyldyń 19 mamyrynda Qytaıdyń Sıan qalasynda ótken edi.