Prezıdent Qudaıbergen Jubanovtyń 125 jyldyq mereıtoıyna oraı quttyqtaý hatyn joldady
AQTÓBE. KAZINFORM – Aqtóbede Qudaıbergen Jubanov atyndaǵy óńirlik ýnıversıtette til bilimi salasyndaǵy alǵashqy qazaq professory, túrkitanýshy, pedagog Qudaıbergen Jubanovtyń 125 jyldyǵyna arnalǵan «Jubanov taǵylymy» atty HІ halyqaralyq ǵylymı konferentsııa ótti.
Іs-sharaǵa oblys ákimi Ashat Shaharov qatysyp, Prezıdent Qasym-Jomart Toqaevtyń quttyqtaý hatyn oqyp berdi.
«Qudaıbergen Jubanov – qazaq lıngvıstıkasynyń teorııalyq negizin qalaýǵa atsalysqan ǵulama ǵalym. Ol til bilimin tereń zerdelep, ǵylymı qaýymdastyq biraýyzdan moıyndaǵan irgeli eńbekter jazdy. Túrkologııanyń ózekti máselelerin jan-jaqty zerttedi. Sonymen qatar túrli jaýapty qyzmetti abyroımen atqaryp, týǵan halqynyń ıgiligi úshin aıanbaı ter tókti. Aǵartýshy-ǵalymnyń eren eńbegi eshqashan umytylmaıdy. Onyń mol murasyn jan-jaqty zerdelep, esimin el jadynda jańǵyrtý – barshaǵa ortaq paryz. Osy oraıda bul basqosýdyń taǵylymdyq mán-mańyzy zor. Tól tarıhymyzda aıryqsha orny bar tuǵyrly tulǵanyń ómiri men shyǵarmashylyq joly jas urpaqqa árdaıym úlgi-ónege bolady dep senemin», - delingen quttyqtaýda.
Óz sózinde óńir basshysy aǵartýshy-pedagogti eske alýǵa arnalǵan sharanyń mańyzdylyǵyn atap ótti.
«Prezıdent atap ótkendeı, Qudaıbergen Jubanovtyń qazaq til bilimi men ádebıettaný salasyndaǵy zertteýleri tereń maǵynaly, onyń ıdeıalary men eńbekteriniń qazirgi qazaq qoǵamy men bilim berý júıesinde alar orny zor. Oǵan – talaı zertteýshi-ǵalymdardyń da bergen joǵary baǵasy dálel. Biz osyndaı sharalardy ótkize otyryp, Qudaıbergen Jubanovtyń jarqyn tulǵasyn jańa qyrynan tanýǵa jol ashamyz», - dedi oblys ákimi.
Halyqaralyq ǵylymı-praktıkalyq konferentsııaǵa Dırektorlar keńesiniń Tóraǵasy, QR ǴJBM Ǵylym jáne joǵary bilim salasyndaǵy sapany qamtamasyz etý komıtetiniń Tóraǵasy Adlet Toıbaev, ýnıversıtet rektory Laýra Qarabasova, tanymal fılolog ǵalymdar, zııaly qaýym ókilderi, Q.Jubanovtyń týystary qatysty.
Konferentsııa aıasynda ýnıversıtet aýmaǵyndaǵy Qudaıbergen Jubanov eskertkishine gúl shoqtary qoıyldy jáne Jastar saraıynda fotokórme ashylyp, «Qudaıbergen Jubanov: tulǵa jáne ýaqyt. Fotomuraǵat» kitabynyń tusaýkeseri ótti.
