Prezıdent Kýbogyna «Aq Bars» xokkeı klýby qatysady
NUR-SULTAN. QazAqparat - Bıyl Qazaqstan Prezıdentiniń kýbogy úshin xokkeıden xalyqaralyq týrnırge 10 jyl tolady. Mereıtoılyq jarysqa Qurlyqtyq xokkeı lıgasynyń myqty komandalary qatysýdy josparlap otyr, dep habarlaıdy QazAqparat tilshisi.
«Barys» xokkeı klýbynyń prezıdenti Borıs Ivanışevtiń aıtýynsha, bıyl QR Prezıdentiniń kýbogy úshin xalyqaralyq týrnırge reseılik komandalardan bólek sheteldiń bir xokkeı klýby da qatysady. «Komandamyzdyń oqý-jattyǵýlary Astanada bastalady. Bárimiz Prezıdent Kýbogynyń mereıtoılyq týrnırine daıyndalamyz. Bıyl atalǵan jarysqa 10 jyl tolyp otyr. Týrnırge myqty komandalar keleıin dep jatyr. Qazan qalasynyń «Aq Bars» xokkeı klýby kelemiz dedi. Ekaterınbýrgtyń «Avtomobılısti» de keledi. Sosyn taǵy eki komandamen sóılesip jatyrmyz. Shetelden bir komanda kelýi kerek. Jalpy, týrnırge bes komanda qatysatyn bolady», - dedi B.Ivanışev Astanada ótken baspasóz máslıxatynda. 
Aıta keteıik, búgingi brıfıngte klýb basshylyǵy aldaǵy Álem chempıonatyna daıyndyq jumystary týraly aıtyp berdi. 25 sáýirde Astanadaǵy «Barys-Arenada» A tobyna kiretin erler komandalary arasyndaǵy I dıvızıon boıynsha Álem chempıonaty ótedi. Qazaqstan quramasy atalǵan básekege daıyndyq sharalaryn bastady. Ulttyq quramanyń bas bapkeri Andreı Skabelkanyń aıtýynsha, komandanyń keńeıtilgen tiziminde Talǵat Jaılaýov ta bar. Qazirgi kezde ol jattyǵýlarǵa kirisip ketti. Endi, komanda basshylyǵy onyń daıyndyǵyn baıqaıdy. Hokkeıshi ózin jaqsy kórsete bilse, negizgi quramǵa enetin bolady. Al Qazaqstan azamattyǵyn alǵan kanadalyq Naıdjel Doýs chempıonatqa qatysýdan bas tartty.
«Biz Naıdjel Doýsqa da usynys jasaǵanbyz. Biraq ol bas tartty. Kevın Dallmen jaıynda eshteńe aıta almaımyz. Ol úıine ketip qalǵan. Ázirshe xabar joq. Roman Starchenko da chempıonatqa qatysa almaıdy. Sebebi qatty jaraqattanyp qaldy. Endi alty aıdaı emdeledi. Sondyqtan ol tek qyrkúıekke qaraı komandaǵa qosylady», - dedi A.Skabelka Astanada ótken baspasóz máslıxatynda.
«Barys» klýbynyń prezıdenti Borıs Ivanışev te Naıdjel Doýstyń chempıonattan qatysýdan bas tartqanyna qatysty pikir bildirdi.
«Ol jaraqatyn emdep, Qurlyqtyq xokkeı lıgasynyń kelesi kezeńine daıyndalmaqshy. Bizge kele almaımyn dep jazdy», - dedi B.Ivanışev.
Bıyl «Barys» xokkeı klýbynyń qyrkúıek aıyndaǵy oıyndary Almatyda ótedi.
