Prezıdent kýbogy: Zakır Safıýllın jaraqat alyp qaldy
Zakır Safıýllın - elimizdegi tájirıbeli boksshylardyń biri. Qazir 32 jastaǵy bylǵary qolǵap sheberi buǵan deıin 2015 jyly Azııa chempıony ataǵyn jeńip alǵan. Zakır Prezıdent kýbogynda jartylaı fınalda bıyl Azııa chempıony atanǵan tájik jigiti Bahodýr Ýsmonovty jeńip ketti. Degenmen alǵan jaraqatyna baılanysty fınalda jekpe-jekke shyǵa alǵan joq.
Al 69 kelide Abylaıhan Júsipov babynda ekenin baıqatty. Bıyl 22 jasqa tolǵan ol qazirdiń ózinde tolaıym tabystarǵa kenelip úlgergen. Ol 2017 jyly álem chempıonatynda qola júlde alsa, sol jyly Azııa chempıonatynda kúmiske qol sozdy. Abylaıhan týrnır barysynda da táp-táýir nátıjege qol jetkizdi. Ol fınalda Talǵat Sháıkenniń osal tusyn tapty.
Týrnır barysynda 75 kelide Tursynbaı Qulahmet sheberligin tanytty. Ol fınalda reseılik Vadım Týkovpen kezdesken edi. Ony aıqyn basymdyqpen jeńgen qazaqstandyq boksshy chempıon atandy.
Aıta keterligi, 81 keli salmaqta jekpe-jek ótkizilgen joq. Fınalǵa joldama alǵan Bekzat Nurdáýletovtiń alǵan jaraqatyna baılanysty ol sharsha alańǵa shyǵýdan bas tartty. Nátıjesinde onymen jekpe-jekke shyǵatyn Erik Áljanov chempıon atandy.
Endi eki salmaqta jekpe-jekter ótkiziledi. Atap aıtqanda, 91 kelige deıingi salmaqta tájirıbeli boksshy Vasılıı Levıt talantty jas boksshynyń biri Aıbek Oralbaımen qolǵap túıistirse, 91 keliden joǵary salmaqta Qamshybek Qońqabaev taǵy bir qazaqstandyq Nurlan Saparbaımen sheberlik baıqasady.
Esterińizge sala ketelik, budan buryn Prezıdent kýbogynda qyzdar arasynda chempıon atanǵan boksshylar jaıynda jazǵan edik. Sondaı-aq, jigitter arasynda eki salmaqta jeńimpaz bolǵan boksshylar jaıynda habarlandy.