Prezıdent kýbogy: Fýtboldan Qazaqstan jasóspirimderi Qyrǵyzstandy oısyrata jeńdi
NUR-SULTAN. QazAqparat - Búgin fýtboldan Qazaqstan Respýblıkasy Prezıdentiniń Kýbogy úshin jasóspirimder arasynda halyqaralyq týrnırdiń alǵashqy týry ótkizildi, dep habarlaıdy QazAqparat tilshisi.
Halyqaralyq týrnırde barlyǵy 6 qurama baq synaıdy. Quramalar eki topqa bólingen. A tobynda Lıtva, Qyrǵyzstan jáne elimizdiń 17 jasqa deıingi quramalary sheberlik baıqasady. Al V tobynda Armenııa, Tájikstan jáne elimizdiń 16 jasqa deıingi quramalary jasyl alańǵa shyǵady.
Búgin eki topta da bir-bir oıynnan ótkizildi. Týrnır V tobyndaǵy Armenııa men 16 jasqa deıingi Qazaqstan órenderi arasyndaǵy kezdesýmen ashyldy. Oıyn 2:2 esebimen teń aıaqtaldy.
Odan keıin A tobyndaǵy 17 jasqa deıingi Qazaqstan jáne Qyrǵyzstan quramalary arasyndaǵy oıyn bastaldy. Bul kezdesýde bizdiń órender qarsylastar qaqpasyna jaýapsyz segiz gol soqty.
Endi 25 tamyzda ekinshi týr oıyndary ótedi. Onda A tobynda Qyrǵyzstan men Lıtva, V tobynda Tájikstan men Armenııa kezdesedi. Al 26 tamyzda elimizdiń 16 jasqa deıingi quramasy Tájikstanmen jasyl alańǵa shyqsa, elimizdiń 17 jasqa deıingi quramasy Lıtvamen sheberlik baıqasady.
Týrnır 28 tamyzda máresine jetedi. Bul kúni fınal, 3-4 jáne 5-6 oryndar sarapqa salynady.
Halyqaralyq týrnır 2008 jyldan beri turaqty túrde ótkizilip keledi. Elimizdiń 17 jasqa deıingi quramasy eki márte chempıon atandy.
