Prezıdent kýbogy: Búgin sharshy alańǵa kimder shyǵady

NUR-SULTAN. QazAqparat – Qazir, ıaǵnı saǵat 15:00-de Nur-Sultanda halyqaralyq Prezıdent kýbogy dodasynyń ekinshi jarys kúni bastalady, dep habarlaıdy QazAqparat tilshisi.

Búgingi jarys kúninde erlermen qatar áıelder de sharshy alańǵa shyǵady. Burymdy boksshylar arasynda 57 kelige deıingi salmaq dárejesinde Sánııa Sultanqyzy tájikstandyq boksshymen qolǵap túıistirse, 69 keli salmaqta qos qazaqstandyq arý Mádına Nurshaeva men Darıǵa Shákimova ózara jekpe-jekke shyǵady.

Al erler arasynda 2019 jylǵy Azııa chempıony Tursynbaı Qulahmet, Qaırat Eralıev bastaǵan birqatar boksshylar sharshy alań kórigin qyzdyrmaq.

Búgin Qaırat Eralıevke qurlyq dodasynda ketken esesin qaıtaratyn múmkindik týdy. Ol úndistandyq Kavınder Bısht Sınghpen kezdesedi. Esterińizde bolsa, qos boksshy Azııa chempıonatynyń shırek fınalynda kezdesip, úndi boksshysy jeńiske jetken bolatyn.

Aıta keteıik, osyǵan deıin Prezıdent kýbogyn qazaqstandyq boksshylar jeńispen bastaǵanyn jazǵan bolatynbyz.