Prezıdent kýbogy: Bokstan ulttyq qurama kapıtany jeńiske jetti
Budan buryn týrnırde qyzdar arasynda chempıon atanǵan sportshylar jaıynda habarlandy. Odan keıin jigitter arasyndaǵy alǵashqy eki jeńimpaz atanǵan sportshylar belgili boldy. Odan keıin jigitter arasynda taǵy tórt salmaqtyń jeńimpazdary anyqtaldy.
Týrnır barysynda aýyr salmaqtaǵy eki jekpe-jek te tartysty ótti. Eki salmaqta da qazaqstandyq boksshylar synǵa tústi.
Sarapshylar 91 kelige deıingi salmaqta Vasılıı Levıt pen Aıbek Oralbaı jekpe-jegin asyǵa kútti. Búginde 31 jastaǵy Vasılıı halyqaralyq jarystarda úlken nátıjelerge qol jetkizip úlgerdi. 2016 jyly Olımpıadada kúmis alsa, 2017 jyly álem chempıonatynda qola júldeger atandy. Al Azııa chempıonatynda 2009, 2015, 2017 jyldarda chempıon boldy. Al Aıbek Oralbaı jasóspirimder arasynda Olımpıada chempıony atanǵan edi. Degenmen, tájirıbeli boksshy Vasılıı Levıt ózin sharshy alańda salqynqandy ustady. Nátıjesinde altynnan alqa taqty.
Al 91 keliden joǵary salmaqta Qamshybek Qońqabaev óz daıyndyǵy joǵary ekenin kórsetti. Ol fınalda Nurlan Saparbaıdan basym tústi. Nurlan Saparbaı 2018 jyly jasóspirimder arasyndaǵy Olımpıadada chempıon atanǵan edi. Al Qamshybek 2017 jyly álem jáne Azııa chempıonattarynda kúmis júldeger bolǵan. Ol bokstan ulttyq quramanyń kapıtany ekeni belgili. Jekpe-jek barysynda Qamshybek qarsylasyn qapy qaldyrdy.
Endi qazaqstandyq boksshylardy álem chempıonaty kútip tur. Qurama bapkerleri oǵan qatysatyn shákirtterin búgingi týrnır nátıjesinde anyqtaıtyn bolady. Dúbirli doda 7-21 qyrkúıek aralyǵynda Reseıdiń Ekaterınbýrg qalasynda ótkiziledi.