Prezıdent kýbogy: Ashat Júsipov fınalǵa shyqty
ASTANA. QazAqparat - Ashat Júsipov Astanada bokstan ótip jatqan halyqaralyq Prezıdent kýbogy týrnıriniń fınalyna shyqty, dep habarlaıdy QazAqparat tilshisi.
Búgin 49 kelide jerlesterimiz Shalqar Aıqynbaı men Ashat Júsipov jartylaı fınalda ózara baq synasty. Nátıjesinde Júsipov tóreshilerdiń sheshimimen jeńiske laıyq dep tanylyp, fınalǵa joldama aldy. Endi ol 10 maýsym kúni fınalda fılıppındik boksshy Aleks Karlospen judyryqtasady.
Sondaı-aq, búgin 52 keli salmaqta synǵa túsken boksshymyz Azamat Isaqulov Qyrǵyzstan boksshysy Jánibek Musaevqa jol berdi. Al 56 kelide óner kórsetken otandasymyz Іlııas Súleımenov shırek fınalda Mońǵolııa boksshysy Týmýrhýıýgti jarys jolynan taıdyryp, jartylaı fınalǵa ótti. Jarys jalǵasýda.
Esterińizge sala keteıik, osyǵan deıin Vasılıı Levıt (91 keli) jáne Ábilhan Amanqul (75 keli) Prezıdent kýbogy týrnıriniń jartylaı fınalyna shyqqan edi. Sondaı-aq, qyzdar arasynda Nazym Qyzaıbaı men Jaına Shekerbekova (51 kel) týrnırdiń jartylaı fınalyna ótken bolatyn.
Búgin Prezıdent kýbogy týrnıriniń ótip jatqanyna tórtinshi kún. Týrnır 13 salmaq boıynsha (10 erler, 3 qyzdar) ótýde. Jarysqa qazaq sportshylarynan bólek, Ózbekstan, Iran, Úndistan, Tájikstan, Fılıppın, Ońtústik Koreıa, Ýkraına, Reseı, Mońǵolııa jáne Qyrǵyzstan elderiniń boksshylary qatysyp jatyr.
Fınaldyq aıqastar 10 maýsymda ótedi.
