Prezıdent kýbogi bokstaǵy basty týrnırlerdiń birine aınalady - Myrzaǵalı Aıtjanov
ASTANA. QazAqparat - Astanada ótip jatqan «QR Prezıdenti kýbogi» dástúrli halyqaralyq boks týrnıri álemdegi basty týrnırlerdiń qataryna qosylady. Bul týraly Qazaqstan quramasynyń bas bapkeri Myrzaǵalı Aıtjanov málim etti, dep habarlaıdy «SPORTINFORM» SAA.
«Osy týrnır bizdiń elimizde ótetin basty halyqaralyq týrnırlerdiń biri, ol ulttyq komandany jyldyń basty básekelerine daıyndaýda negizgi mindetti atqarady. Qazir Azııa oıyndaryna daıyndalyp jatyrmyz. Biz birinshi nómirli boksshylarymyzdyń daıyndyǵyn, babyn baıqap kóremiz. Týrnırge aıtarlyqtaı kóp qatysýshy jınaldy. Máselen, amerıkalyqtar barlyq birinshi nómirli boksshylaryn ákeldi, ózbekter de eń myqty quramymen keldi, olardyń ishinde Hasanboı Dýsmatov, Bektemir Meliqýzıev, Israıl Madrımovter de bar. Reseılikter, taılandtyqtar, mońǵoldar keldi», - dedi M. Aıtjanov.
Onyń sózine qaraǵanda, Qazaqstan boks federatsııasy ulttyq quramanyń damýy úshin barlyq amaldy qarastyryp jatyr. «Jýyq arada «Prezıdent kýbogi» álemde olımpıadalyq bokstyń basty týrnırleriniń birine aınalýy tıis», - dedi bas bapker.
Eske sala keteıik, QR astanasynda 5 maýsymda bastalǵan dástúrli týrnır 10-yna deıin jalǵasady.
