Prezıdent kýbogi: Ámir Omarhanovty utqan tennısshi fınalǵa shyqty
ASTANA. KAZINFORM — Prezıdent kýbogy úshin Astanada ótip jatqan ATP Challenger Tour týrnıriniń fınalyna shyqqan tennısshiler anyqtaldy.
Bul jarys álemniń 533-raketkasy, 22 jastaǵy grýzııalyq Saba Pýrtseladze úshin sátti boldy deýge negiz bar. Grýzııalyq sportshy jartylaı fınalda álemniń 437-raketkasy, reseılik Evgenıı Karlovskııdi joldan taıdyrdy – 6:0, 6:4.
S.Pýrtseladze fınalda álemniń 356-raketkasy, bolgarııalyq Dımıtar Kýzmanovpen chempıondyq ataqty sarapqa salady. D.Kýzmanov jartylaı fınalda reıtıngide 622-satyda turǵan grýzııalyq Aleksandr Bakshıdi súrindirdi – 6:2, 6:4. A.Bakshı keshe shırek fınalda 3 saǵat 21 mınýtqa sozylǵan óte tartysty matchta reıtıngide 582-oryndaǵy ózbekstandyq Sergeı Fomındi utqan edi – 7:6 (7:5), 6:7 (3:7), 7:6 (7:3).
Bıyl Prezıdent kýbogi úshin chellendjer dodasyna jasóspirimder arasynda álemniń 15-raketkasy, 16 jastaǵy Ámir Omarhanov alǵash ret qatysty. Ol ekinshi aınalymda S.Pýrtseladzege jol berdi – 3:6, 4:6. Degenmen Ámir ekinshi aınalymǵa ótkendikten, ATP reıtıngisi úshin bastapqy 4 upaıyn alyp úlgerdi.
Á.Omarhanov aldaǵy ýaqytta jasóspirimder arasynda AQSh ashyq chempıonaty jáne basqa jarystarǵa qatysatynyn málimdedi. Kelesi jyly qarashada 18 jasqa tolatyn tennısshiniń eresekter arasyndaǵy dodalarǵa birtindep qosylýǵa tolyq múmkindigi bar.
Eske sala keteıik, budan buryn Aleksandr Nedovesovtiń Shvetsııada fınalǵa bir qadam jetpeı toqtaǵanyn jazǵan bolatynbyz.
Taǵy bir qazaqstandyq, reıtıngide 223-satydaǵy Tımofeı Skatov jekeleı synda Bostad (Shvetsııa) ATP 250 týrnıriniń shırek fınalynda álemniń 51-raketkasy, portýgalııalyq Nýný Borgeshke ese jiberdi – 4:6, 3:6.
Degenmen alǵash ret ATP 250 dodasynyń shırek fınalyna deıin jetken T.Skatov qazirgi kezde álemdik reıtıngide 183-orynda tur.
