Prezıdent: Kitap oqý – jastardy aqparat tasqynyna jutylyp ketýden saqtaıtyn rýhanı qalqan
ASTANA. KAZINFORM – Aqordada ustazdardyń kásibı merekesine oraı saltanatty is-shara ótti. Jıynda Qasym-Jomart Toqaev Kitap oqý – jastardy ústirt oılaýdan jáne aqparat tasqynyna jutylyp ketýden saqtap qalatyn rýhanı qalqan ekenin atap ótti.
Prezıdent ótken aptada Astanada jasandy ıntellekt taqyrybyna arnalǵan aýqymdy is-sharalar ótkenine toqtaldy.
– AI & Digital Bridge – 2026 forýmy, sondaı-aq belgili mamandar men sarapshylardyń qatysýymen Jasandy ıntellektini damytý jónindegi keńestiń otyrysy boldy. Osy otyrysta Qazaqstannyń asa mańyzdy salada mol tabysqa jetkeni atalyp ótti. Biraq bul jaıbaraqat otyrýǵa bolady degen sóz emes. Sebebi jasandy ıntellekt pen jańa tehnologııalar óte joǵary qarqynmen damyp jatyr. Bul – ýaqyt talaby. Budan bólek, elordamyzda tuńǵysh ret Astana AI Film festıvali ótti. Shyn máninde, bul – naǵyz ozyq ınnovatsııalyq is-shara dep aıtýǵa bolady. Óıtkeni dál osy óte ózekti jáne mańyzdy shara aıasynda Astana qalasynda álemde alǵash ret jasandy ıntellektiniń kıno ónerindegi kórinisi paıda boldy. Basqasha aıtsaq, atalǵan festıval burynnan qalyptasqan dástúrli kıno óndirisiniń ózektiligi azaıa bastaǵanyn kórsetti. Endi fılm túsirýmen aınalysatyn mamandar sheneýnikterdiń, demeýshilerdiń jáne prodıýserlerdiń qoldaýyna táýeldi bolmaı, óz betimen tolyqqandy kıno týyndysyn shyǵara alady. Sondyqtan Astanada ótken bul naǵyz jahandyq aýqymdaǵy fılm festıvaline álem jurtshylyǵy aıryqsha nazar aýdardy, – dedi Qasym-Jomart Toqaev.
Alaıda Prezıdent ozyq tehnologııa dáýirinde kitap oqýdyń da mán-mańyzyn arttyrýymyz qajet sanaıdy. Bul rette Memleket basshysy óskeleń urpaqqa osy qundylyqty sińirýge tutas qoǵam atsalysýy qajet ekenin aıtty.
– Halqymyzdyń asyl perzenti Ábish Kekilbaevtyń «Adamdy adam etken – kitap, adamzat etken – kitaphana» degen tamasha sózi bar. Kitap bilimpazdyqqa, janashyrlyqqa, parasattylyqqa, eńbekqorlyqqa baýlıdy. Kitap oqý – azamattardy, ásirese, jastardy ústirt oılaýdan jáne aqparat tasqynyna jutylyp ketýden saqtap qalatyn rýhanı qalqan. Sondyqtan men bıyl mamyr aıynda «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyqqa qol qoıdym. Bul mindetti júzege asyrý úshin Úkimet jyl sońyna deıin tıisti tujyrymdama qabyldaıdy, – dedi Qasym-Jomart Toqaev.
Prezıdent sońǵy jeti jylda elimizde 1 mıllıonnan astam oqýshyǵa arnalǵan 1342 mektep salynǵanyn aıtty.
